Brunei Darussalam Hakarak Servisu Hamutuk iha Área Haat

Hatutan.com, (20 Fevereiru 2024), Díli—Brunei Darussalam hakarak servisu hamutuk ho Timor-Leste (TL) iha área haat mak hanesan saúde, edukasaun, petróleu no gás.

Embaixadór Brunei Darussalam iha Timor-Leste (TL), Hadfi Lutfan hala’o enkontru ho Prezidente Repúblika (PR), José Ramos-Horta iha Palásiu Prezidensiál Nicolau Lobato Bairru-Pité, Tersa (20/02/2024). Foto: Tomé da Silva.

Área haat ne’e, Prezidente Repúblika (PR), José Ramos-Horta diskute ona ho Xefe Estadu Brunei Darussalam bainhira vizita bá nasaun ne’e iha tinan kotuk.

Lee Mós: Novembru Asina Akordu, Brunei Darusalam Presiza Traballadór Timoroan 20.000

Embaixadór Brunei Darussalam iha Timor-Leste (TL), Hadfi Lutfan ohin hakarak kofrma hikas atualiza komitmentu ne’e liu hosi enkontru ho Ramos-Horta iha Palásiu Prezidensiál Nicolau Lobato Bairru-Pité, Tersa (20/02/2024).

Timor-Leste no Brunei Darussalam iha kooperasaun bilaterál ida amigável no sempre iha kooperasaun no kompromisu atu servisu hamutuk iha área hotu-hotu ne’ebé lori benefísiu ba dezenvolvimentu ekonómiku país rua nian.

Hadfi Lutfan afirma, ba oin Timor-Leste ho Brunei Darussalam bele haree dook liu hodi esplora oportunidade sira ne’ebé bele tulun dezenvolvimentu ekonómiku no Rekursu umanu iha Timor-Leste.

“Ohin mai hasoru Prezidente Repúblika José Ramos-Horta atu konfirma fila-fali kona-bá rezultadu sira hosi vizita Estadu nian bá Brunei Darussalam tinan kotuk no asuntu saúde, edukasaun,  petroleu no gás mak sai tema diskusaun entre Xefe Estadu rua. Brunei Darusalam iha komitmentu atu servisu hamutuk ho Timor Leste iha área hirak ne’e,” Hadfi Lutfan hateten.

Diplomata ne’e hatutan, Brunei Darussalam oras ne’e preparadu no hein hela Ministériu tutela sira iha área saúde, edukasaun, petroleum no gás atu bele hakle’an diskusaun kona-bá nesesidade ne’ebé Timor Leste nesesita.

Iha enkontru ne’e Prezidente Repúblika José Ramos-Horta hato’o mós konvite bá Embaixadór Brunei Darussalam Hadfi Lutfan atu Liurai ne’ebé mós nu’udár Xefe Estadu Brunei Darussalam Hassanal Bolkiah Mu’izzaddin bele vizita Timor-Leste.

Jornalista: Vito Salvadór