Polísia Kaptura Suspeitu Ida Envolve Kazu Taa Luis Vicente iha Kampu Baru

Hatutan.com, (23 Fevereiru 2024), Díli-Polísia Nasionál Timor-Leste (PNTL) halo ona kapturasaun no detensaun bá suspeitu ida ho inisiál JF hosi na’in-rua  ne’ebé kondús motór taa vítima Luis Vicente Tou iha estra Eskola 05 de Maio, Kampu Baru, Comoro, Díli.

Lee Mós: Governu Orienta no Dezafia PNTL Kaptura Lalaís Autór Oho Isaac Hornai

Polísia detein suspeitu ida hosi na’in-rua ne’ebé taa vítima Luis Vicente Tou iha estra Eskola 05 de Maio, Kampu Baru, Comoro, Díli, Kinta kalan (22/02/2024). Foto/Tome da Silva

Kazu krime arma branka ne’e akontese iha Kinta kalan (22/02/2024), iha ne’ebé, suspeitu na’in-rua kondús motór halai besik bá vítima ne’ebé tuur hela hodi lori kroat atu hanesan samu-rai taa kedas bá vítima nia kotuk laran.

Hosi video gravasaun CCTV ho durasaun 08.16 minutu ne’ebé viral iha media sosiál hatudu vítima la uza faru tuur hela iha estrada-ibun, derrepente suspeitu na’in-rua kondús motór halai rabat mai vítima taa kedas vítima nia kotuk laran.

Hafoin taa tiha vítima, suspeitu na’in-rua halai liu kedas no vítima sofre kanek iha parte kotuk-laran, kabas, no liman-kabun.  

Iha Sesta dadeer ne’e kedas PNTL Eskuadra Dom Aleixo evakua vítima bá halo tratamentu saúde intensivu iha Ospital Nasionál Guido Valadares (HNGV).

Komandante PNTL Munisípiu Díli, Superintendente Xefe Polísia Orlando Gomes, Sesta (23/02/2024), relata katak  deskonfia kazu Kampu Baru da’et mai Bebora iha ne’ebé suspeitu nain-rua ne’e kondús motór lori samurai taa  karreta Grand Max ida no momentu ne’ebá Polisia patrullamentu Dom Aleixo duni tuir konsege kaptura e suspeitu na’in ida no ida seluk ho motór halai liu.

“Kazu ida agora ne’e konsidera kazu arma branka ne’ebe uza sasán kro’at halo sirkulasaun iha tempu kalan hodi taa ema. Iha momentu ne’ebá ita-nia Poliíia patrullamentu kaptura kedas depois submete kedas mai iha ne’e hodi halo prosesu investigasaun,” Superintendente Xefe Polísia Orlando Gomes informa.

“Ho akontesimentu sira ne’ebé mak agora daudauk la’o, ita hatene ona katak sira-nia movimentu mak iha oras madrugada nian. Tanba ne’e, ita alerta ona bá PNTL hodi iha esforsu oinsá halo movimentu maka’as liu iha tempu kalan bá to’o iha oras madrugada hodi  prevene asaun kriminál sira ne’ebé mak mosu iha sidade Dili,” Nia tenik tan.

Jornalista Estajiáriu: Lazaro Pereira Quefi