Xina Oferese Motór Patrulla Lima bá Polísia Tránzitu Nasionál

Hatutan.com, (26 Fevereiru 2024), Dili—Governu Xineza liu hosi ninia embaixada iha Díli oferese motór patrulla (batedores) ho marka CFMOTO hamutuk lima bá Polísia Tránzitu Nasionál atu assegura aktividade entidade sira hosi rai-liur no mós órgaun soberania haat iha Timor-Leste (TL).

Governu Xineza liu hosi ninia embaixada iha Díli oferese motór patrulla (CFMOTO) hamutuk lima bá Polísia Tránzitu Nasionál atu assegura aktividade entidade sira hosi rai-liur no mós órgaun soberania haat iha Timor-Leste (TL), Segunda (26/02/2024). Foto: Lázaro Quefi

Komandante departamentu Tránzitu Seguransa Rodoviária Nasionál, Assistente Superentendente, Luis da Costa hateten, prosesu atu hetan motór lima ne’e desde atuál Segundu Komandante Jerál Pedro Belo momentu sei assume kargu hanesan Komandante Operasaun Nasionál iha tinan 2022, momentu ne’ebá nia halo proposta ida bá embaixada Xina atu bele hetan tulun liuliu bá motór.

Lee Mós: Outubru, Infratór Sira Kontribui $68.650 bá Tránzitu Nasionál

“Tanba ne’e ohin PNTL liu hosi Tránzitu Nasionál kontenti simu duni apoiu hirak ne’ebé mak oferese hosi Embaixada Xina,” Luis da Costa hateten iha Kuartél Jerál PNTL Caicoli, Díli, Segunda (26/02/2024).

Nia lori Polísia Tránzitu Nasionál Timor-Leste nia naran agradese bá embaixada Xina liu hosi kooperasaun bilaterál bele fó apoiu ne’e bá PNTL.

Nia kontente tanba ho apoiu hirak ne’e bele substitui fali motór boot haat PNTL nian ne’ebé mak hetan estragus hosi inundasaun iha tinan hirak liu bá, no sei bele uza atu halo eskoltu bá superiór sira iha aktividade sira.

Ho tulun ida-ne’e PNTL liuliu Polisia Nasionál Tránzitu fiar katak sei halo servisu di’ak liu tán hosi apoiu hirak ne’ebé mak embaixada Xina fó mai Timor-Leste.

Jornalista Estajiáriu:  Lazaro Pereira Quefi