Polítika
PN Seidauk iha Inisiativa Revoga Artigu Sira Lei Indultu Ne’ebé TR Konsidera Inkonstitusionál
Hatutan.com, (28 Fevereiru 2024), Díli– Komisaun A Parlamentu Nasionál (PN) ne’ebé trata asuntu Lejizlasaun no Justisa, seidauk iha inisiativa hodi revoga artigu sira iha lei indultu ne’ebé Tribunál Rekursu deklara inkonstitusionál.
Lee Mós: Artigu Sira Hosi Lei Indultu Ne’ebé Tribunál Rekursu Konsidera Inkonstitusionál
Prezidente Komisaun A PN, Patrocinio Fernandes. Foto/Tome da Silva
Prezidente Komisaun A PN, Patrocinio Fernandes hateten kualker lei ne’e inisiativa mai hosi deputadu/a sira atu revoga ka la revoga ne’e tenke mínimu deputadu na’in-lima (5) maka subskreve para depois aprezenta nu’udár inisiativa ida. Sé laiha inisiativa hosi deputadu sira maka sei laiha dalan para deputadu ida mesak atu submete revogasaun bá lei ne’e.
“Iha lei barak ne’ebé atu halo, nune’e sei la iha inisiativa hodi revoga lei ne’e, ami haree katak iha lei barak halo, iha mós servisu barak atu halo no la presiza konsentra bá servisu lei indultu nian, mais lei ne’e entra em vigor hela, menus artigu tolu ne’ebé tribunál deklara inkonstitusionál labele aplika,” Deputadu Patrocinio Fernandes informa bá jornalista sira iha PN, Kuarta (28/02/2024).
Jornalista Estajiária : Zita Menezes