TL-Malázia Sei Asina Akordu Formál iha Aero

Hatutan.com, (29 Fevereiru 2024), Díli—Malázia ho Timor-Leste (TL) sei selebra asinatura kooperasaun bilaterál iha área Aero nian hodi fasilita movimentasaun transporte aero entre país amigu rua, iha tempu badak.

Embaixadór Malázia iha Timor-Leste, Amarjit Sarjit Singh hasorumalu ho Primeiru-Ministru (PM), Kay Rala Xanana Gusmão hodi atualiza kona-bá akordu formál entre Governu Malázia no Timor-Leste iha área Aero, Palásiu Governu, Kinta (29/02/2024). Foto: GPM.

Embaixadór Malázia iha Timor-Leste, Amarjit Sarjit Singh hateten asuntu ne’e iha Palásiu Governu, Kinta (29/02/2024).

Lee Mós: Polítiku Malázia ho Timor-Leste Buka Hatene ho KPU kona-bá Kandidatura Gibran Rakabuming

Embaixadór ne’e hateten, durante sorumutu ho Primeiru-Ministru (PM), Kay Rala Xanana Gusmão atualiza kona-bá akordu formál entre Governu Malázia no Timor-Leste  iha área Aero nian hodi fasilita movimentasaun transporte aero semo hosi Malázia mai Timor-Leste no aviaun hosi Timor-Leste semo bá Malázia.

“Iha oportunidade ida ne’e mós ha’u atualiza mós bá Primeiru-Ministru kona-bá asuntu akordu Aero nian ne’ebé sei asina entre nasaun Malázia no Tiomr-Leste ne’ebé remata ona diskusaun. Agora hein atu asina akordu hodi ita bele fasilita aviaun bele semo tuir oráriu hosi Kuala Lumpur mai Dili no Dili ba Kuala Lumpur iha tempu badak,” Amarjit Sarjit Singh hateten iha komunikadu.

Durante sorumutu ho Xefe governu Timor-Leste, diplomata Malázia ne’e lori mos delegasaun seitór privadu sira hodi atualiza informasaun kona-bá kooperasaun servisu ne’ebé sira hakarak investe iha Timor-Leste, liu-liu iha área intersante sira iha seitór saúde, investimentu iha seitór petroliu, gás no seluk tan.

Diplomata ne’e informa katak, Xefe Governu Timor-Leste agradese no promote sei atualiza informasaun sira ne’e hotu bá membru Governu tuteladu sira atu apoia servisu hotu ne’ebé Timor-Leste no Malazia koopera bele finaliza lalais akordu hirak ne’e iha tempu besik.

Antes ne’e Governu Malázia mós deklara sei ajuda politika desentralizasaun ne’ebé IX Governu Konstitusionál sei implementta iha Timor-Leste.

Jornalista: Vito Salvadór