Fevereiru, Sidadaun 11 Mate Tanba Asidente no Kofre Estadu Hetan $88.583

Hatutan.com, (04 Marsu 2024), Díli—Komandu Polísia Nasionál Timor-Leste (PNTL) liu hosi Departamentu Tránzitu Nasionál (DTN) relata katak, durante fulan-fevereiru 2024 iha sidadaun na’in-11 mak lakon vida ka mate tanba de’it hetan asidente tráfegu ho motór no karreta ne’ebé mak akontese iha territóriu nasionál.

Xefe Departamentu Tránzitu Nasionál no Seguransa Rodoviáriu, Superintendente Asistente Polisia Luis Costa.

Xefe Departamentu Tránzitu Nasionál no Seguransa Rodoviáriu, Superintendente Asistente Polisia Luis Costa informa, hahú hosi 01 to’o 29 fevereiru 2024 servisu Tránzitu Rodoviáriu nian, hosi Tránzitu Nasionál bá to’o iha Tránzitu munisipiu 14, rejista kazu asidente hamutuk 163.

Lee Mós: PNTL Submete Kazu Asidente Tráfegu 58 bá Ministériu Públiku

“Hosi 163 kazus ne’e, ita fahe bá iha kategória tolu. Lakon vida, kanek todan, nomós kanek kamán. Hosi totál kazu ne’e iha fulan-fevereiru ne’e, ema na’in 11 mak mate impaktu hosi asidentes ne’e rasik,” Xefe Departamentu Tránzitu Nasionál no Seguransa Rodoviáriu, Superintendente Asistente Polisia Luis Costa, hateten iha kna’ar fatin Kuartél Jerál, Caicoli, Dili, Segunda (04/03/2024).

La’ós ne’e de’it, hosi kazu asidente ida ne’e rasik mós iha ema hamutuk na’in-30 mak hetan kanek todan, ema 187 mak kanek kaman.

Hosi totál kazu 163 ne’e, kazu lima mak konklui ninia prossesu finál, kazu 11 mak kontinua prossesa bá Tribunál, kazu 74 mak sei iha prossesu laran no kazu 73 mak infratór sira deside hodi rezolve de’it iha família.

“Fatór sira ne’ebé mak influensia bá iha asidentes ne’e maka, tuir ita hotu hatene katak, fatór umanu maka nia persentájen ne’e boot liu,” komandante Luis Costa, hateten.

Aplikasaun Koima

Komandante Tránzitu Nasionál ne’e mós informa katak, hosi totál infrasaun hirak ne’ebé Infratór sira komete iha komandu munisipiu 14, ekipa seksaun tránzitu sira rekolla reseitas hamutuk $75.228.

Hosi totál reseita ne’ebé maka iha, Tránzitu Nasionál maka konsege rekolla koimas boot liu, no hatama ona bá kofre Estadu, hamutuk $23.465.

Tuir fali, komandu munisipiu Dili, liuhosi seksaun tránzitu hatama reseita $17.184. Munisipiu Aileu, hatama $6.864.

Komandu Munisipiu Bobonaro, iha fulan-fevereiru ne’e, konsege hatama reseita bá kofre Estadu hamutuk $4.659. Munisipiu Likisá hatama reseita $4.318 no Munisipiu Baucau hatama reseita $4.002.

“Hakarak informa mós katak, iha fulan-fevereiru, Tránzitu Nasionál maka konsege hatama reseitas boot liu, no primeiru-véz, foin hetan montante osan ida boot hanesan ne’e,” nia tenik.

Tipu infrasaun ne’ebé maka Infratór sira konsege vióla ne’e maka, primeiru, infrasaun kona-bá kontra órdem autoridade tránzitu, hamutuk 565. La lori dokumentus orijinál, ne’e kuaze infratór sira vióla. La uza kapasete, kontra sinais tránzitu, no inspesaun liu prazu.

Karreta 1.016 Tama Hosi Fronteira

Polisia tránzitu ne’ebé mak servisu iha fronteiras tolu, Batugade (Mota-Ain), Salele (Mota-Masin), Sakato (Wini), ninia papél maka oinsá bele fó autorizasaun, lisensa bá iha transportes ne’ebé mak pezadu no lizeiru atu bele autoriza tama, tuir pedidu ne’ebé maka sira informa bá tránzitu.

Sira balun husu hakarak tama mai Timor-Leste hodi vizita família, balun halo negósiu, ida-ne’e hosi parte tránzitu atu bele fó billete sirkulasaun, depois tempu hotu hakarak ka lakohi, sira bele fila-fali bá iha sira-nian nasaun oríjen.

“Nune’e, durante fulan-fevereiru liuhosi atividade kontrolu bá transporte ka veikulus pezadus nomós lizeirus ne’e, hakarak atu informa bá públiku katak, totál kareta ne’ebé maka ultrapassa iha ita-nian fronteiras Terrestre tolu ne’e hamutuk 1.016 veíkulus,” nia hateten.

Hosi totál númeru ne’e, kategória bá rua, iha veikulus pezadus nian hamutuk 582 kareta maka tama mai, nomós veíkulus lizeirus hamutuk 434 veíkulus.

Totál veíkulu ka karreta pezadu sira ne’ebé tama hosi fronteira Batugade (Mota-Ain), hamutuk 414, no kareta lijeiru iha 350.

Hosi Postu fronteira Salele (Mota-Masin), hamutuk 124, fahe bá kategória pezadu maka 86 veíkulus, no lijeiru hamutuk 38 veikulus.

Hosi Postu fronteira Sakato (Wini) nian, hamutuk  veikulus 128, fahe bá kareta pezadu hamtuk 82, nomós lijeirus hamutuk 46.

Reseitas Hosi Fronteiras Terrestres

Totál reseitas ka osan ne’ebé ekipa tránzitu sira rekolla hosi Fronteiras Terrestres Timor-Leste nian hanesan, Batugade (Mota-Ain), Salele (Mota-Masin), Sakato (Wini), no konsege hatama bá kofre Estadu nian, hamutuk $12.355.

“Totál reseitas iha fulan-fevereiru nian ne’ebé ita rekolla hosi infratór sira hosi infrasaun nomós reseitas fronteiras ne’e, ita konsege hatama bá kofre Estadu ne’e hamutuk $88.583,” komandante Luis Costa, hateten.

Jornalista: Rogério Pereira Cárceres