Líder Bankada Sira Promete-tán Halo Eleisaun bá Komissáriu CAC iha 19 Marsu

Hatutan.com, (14 Marsu 2024), Díli—Reuniaun líder bankada sira iha Kinta 14 Marsu lidera hosi Prezidente Parlamentu Nasionál, Maria Fernanda Lay no partisipa hosi Vise-Ministru Asuntu Parlamentár Adérito da Costa Hugo, deside no promete tán atu tau fila-fali ajenda eleisaun komissáriu Comissão Anti-Corrupção (CAC) iha Tersa (19/03/2024).

Sekretária Meza Parlamentu Nasionál, deputada Virginia Ana Belo.

“Elisaun bá Komisáriu CAC sei halo iha Tersa 19 Marsu tanba iha ona konkordánsia entre Parlamentu Nasionál ho Governu. Signifika, bankada hotu-hotu aseita ona mak deside halo eleisaun iha semana oin,” Sekretária Meza Parlamentu Nasionál, Virginia Ana Belo  hateten iha PN, Kinta (14/03/2024).

Lee Mós: Kandidatu Úniku iha Ona, CNRT-FRETILIN Mak Laiha Seriedade Hodi Hili Komisáriu CAC

Nia dehan, durante ne’e instituisaun sira, sosiedade sivíl ho povu hotu-hotu preokupa hela ho kargu ida komisáriu CAC nian ne’ebé durante ne’e mamuk kuaze tinan tomak ida to’o agora.

“Tanba ne’e ita espera katak, Tersa bele realiza ona eleisaun atu prossesu sira ne’ebé agora daudaun pendente hela bele iha ona andamentu bá prossesu bá oin,” nia hateten.

Iha fatin hanesan, deputadu bankada FRETILIN, Joaquim dos Santos Borululi hateten, lista kandidatu Komissáriu CAC nian Governu submete ona bá Parlamentu Nasionál no hein Prezidente PN atu halo ajendamentu hodi bá vota.

Nia dehan, pozisaun politika iha Parlamentu Nasionál kualkér kandidatu aprezenta hosi Governu, Parlamentu Nasionál hein bá vota de’it.

“Karik iha ona ajenda, entaun ita bá vota de’it. Konkorda ka la konkorda vota kontra, importante tenke liu ho votus 33. Maibé prezensa obrigatóriu tenke deputadu na’in 49,” nia hateten.

Jornalista Estajiária: Zita Menezes