Relatóriu bá Xefe Estadu, Simeira ASEAN Alerta bá Líder Sira Halo Diálogu bá Pás

Hatutan.com, (14 Marsu 2024), Díli—Primeiru-Ministru (PM), Kay Rala Xanana Gusmão relata rezultadu hosi partisipasaun Timor-Leste (TL) nian iha Simeira ASEAN-Austrália bá Prezidente Repúblika (PR), José Ramos-Horta, katak, durante simeira ne’e alerta bá líder sira rejiaun Sudeste Aziátiku atu kontinua halo diálogu bá pás iha mundu.

Primeiru-Ministru (PM), Kay Rala Xanana Gusmão hala’o enkontru semanál ho Prezidente Repúblika (PR), José Ramos-Horta iha Palásiu Prezidensiál Nicolau Lobato Bairru-Pité, Kinta (14/03/2024). Foto: Elio dos Santos da Costa.

Kay Rala Xanana Gusmão hateten, foin fila hosi Austrália-Melbourne partisipa iha simeira ASEAN ho Austrália ne’ebé halo tinan 50, no bá iha ne’ebá kontente tebes tanba bele aprende iha momentu Timor Leste iha hela preprasaun atu sai membru ASEAN iha 2025.

Lee Mós: Simeira ASEAN-Austrália Fortifika Solidariedade-Unidade bá Dezenvolvimentu Ekonómiku

“Iha simeira ASEAN Austrália ita haree liu-liu tensaun sira iha área Sudeste Aziátiku nian no ami hotu husu nasaun sira ASEAN no Austrália rasik atu líder hosi rejiaun ne’e buka diálogu. Labele aumenta tensaun buka diálogu tanba funu iha Ukránia no iha Gaza Palestina halo ita hotu sente katak nia afeita bo’ot tebes,” Kay Rala Xanana Gusmão hateten hafoin enkontru ho Xefe Estadu iha Palásiu Prezidensiál Nicolau Lobato Bairru-Pité, Kinta (14/03/2024).

Xefe Governu dehan, iha enkontru ASEAN identifika tensaun sira iha fatin-fatin iha mundu no líder sira buka halo diálogu hodi redús tensaun sira ne’e no fó solusaun atu hapara konflitu sira ne’ebé afeita bá umanidade.

“Prinsípiu di’ak ida hosi enkontru iha ASEAN Austrália maka tensaun sira ne’ebé iha ita identifika no líder sira responsável Governu nasaun nian ko’alia bá malu atu buka solusaun no labele provoka malu sai funu, tanba ita lakohi ona atu iha tán funu,” nia subliña.

Nune’e Xanana Gusmão dehan, presiza servisu maka’as nafatin hodi prepara-an bá tinan 2025 atu TL sai membru permanente ASEAN.

Jornalista: Vito Salvadór