Hatutan.com, (25 Marsu 2024), Díli—Ministériu Públiku (MP) sei halo estradisaun bá fujitivu Arnolfo Teves Jr ne’ebé komete krime asasinatu iha Filipina no oras ne’e kumpre hela detensaun provizóriu.
Prokuradór Jerál Repúblika (PJR), Alfonso Lopes halo ona audiénsia ho Prezidente Repúblika (PR), José Ramos-Horta hodi ko’alia kona-bá asuntu ne’e, iha iha Palásiu Prezidensiál Nicolau Lobato Bairru-Pité, Segunda (25/03/2024).
Lee Mós: Fujitivu Arnolfo Teves Jr Tama TL ho Jet Privadu iha Abríl 2023 no Simu hosi Asesór Prinsipál Estadu RDTL
“Ohin halo audiénsia ho Prezidente Repúblika ko’alia kona-bá notísia ne’ebé sai bá públiku, liu-liu kona-bá ita-nia polísia sientifika kumpre mandadu detensaun hosi Autoridade kompetente país Filipina nian, liu-liu Tribunál Filipina no alerta liu hosi notísia vermella hodi halo detensaun bá Fujitivu Arnolfo Teves Jr,” Alfonso Lopes hateten.
Ho karta detensaun no dokumentu formál hosi Autoridade Filipina nian ne’e maka, husu polísia sientifika TL nian no emite mai PJR nu’udár autoridade sentrál.
PJR esplika, tuir Lei númeru 15/2011 bainhira iha detensaun internasionál, depois simu dokumentu sira ne’e tenke transmite ka haruka mai PJR nune’e bele halo promosaun bá Tribunál Supremu maibé tanba Timor-Leste seidauk iha, entaun haruka de’it bá iha Tribunál Rekursu (TR) tuir Lei haruka.
Alfonso Lopes mós informa katak, oras ne’e daudaun sidadaun Filipina ne’e kumpre hela detensaun provizóriu hodi hein prossesu administrativu hosi autoridade Filipina nian mai iha PJR nune’e bele halo estradisaun.
“Para fim detidu ida-ne’e bele halo estradisaun. Entaun prossesu ne’e ita sei tuir no autoridade sentrál PJR sei formula pedidu bá autoridade sira, liu-liu bá Tribunál Estadu Filipina. Bainhira fó ona resposta mai, prossesu administrativu PJR sei haruka bá ita nia Governu liu-liu Ministériu Justisa kona-bá prossesu ida-ne’e,” nia esplika.
Jornalista: Vito Salvadór
