Hatutan.com, (26 Marsu 24), Díli—Deklarasaun politíka bankada KHUNTO iha Parlamentu Nasionál (PN), rekomenda bá Governu katak, presiza duni atu investe hodi konstrui fatin própriu bá fornesimentu kombustível iha Sentrál Elétrika Hera no Betano.
Xefe bankada KHUNTO, deputadu António Verdiál de Sousa Gama rekomenda ne’e tanba tuir nia haree katak, planu konstrusaun sentrál elétrika rua ne’e laiha previzaun no konstrusaun infra-estrutura bá kargamentu kombustível.
Lee Mós: MPM-ANP Esforsu Buka Estratejia Hodi Antesipa Krize Konbustível iha TL
Nia dehan, baibain kuandu transporta kombustível hosi Portu Tibar bá sentrál elétrika Hera via terrestres ne’e bele lori risku.
“Hotu-hotu hatene katak, liuhosi meius transporte terrestre ne’e bele hamosu problema kona-bá seguransa no risku ne’ebé proveniente hosi nia sirkulasaun,” Xefe Bankada KHUNTO, deputadu António Verdial de Sousa hateten iha Plenária PN, Tersa (26/03/2024).
Tuir nia hatene katak, transportasaun kombustivel hosi Portu Baia Tibar bá Sentrál elétrika Hera liuhosi terrestre, Ministériu Obras Públika liu hosi EDTL,E.P sempre selu sentavu tolu kada litru no EDTL,E.P kontinua transporta kombustivél hosi Portu Baia Tibar to’o Sentrál Elétrika Betanu iha Same Manufahi kada litru selu $12.
Nia hatutan, akontese iha Hera no Betano ne’ebé seitór privadu involve hasoru investimentu sira iha infraestrutura no iha Hera, seitór privadu konstrui ona CBM (Conventional Buoy Mooring) dahuluk no tuir mai konstrui Jetty ho empreza ETO.
Iha situasaun ne’e, nia haree katak, empreza sira ne’ebé partisipa iha konkursu internasionál bá fornesimentu kombustível ba sentrál elétrika Betano hakarak harii métodu di’ak liu ba fornesimentu.
“Nune’e, ha’u hakarak haktuir katak, depois haree várius testamuña, ami hetan koñesimentu katak empreza privadu nasionál Sacom Energia hosi grupu Sacom, aprezenta sira-nia proposta hodi konstrui Infra-estrutura kombustível ida-ne’e bá sentrál Betanu iha faze rua bainhira hetan kontratu fornesimentu bá Betanu iha tinan 2017. Faze dahuluk inklui CBM (Conventional Buoy Mooring) no Floating Hose (Mangueira flutuante ho gastu dupla hamutuk km neen hosi tasi-ibun to’o sentrál),” nia esplika.
Nune’e liuhosi observasaun hosi bankada KHUNTO hakarak espresa katak ho medida ida-ne’e, Sacom energia hetan prejuízu ne’ebé boot tebes.
“Husu ita-nia haree kondisaun naturál Tasi Mane iha Betano, bainhira halo komparasaun karik ne’e dook loos ho kondisaun iha Hera, tanba distánsia hosi sentrál Betano ho praia no lokalizasaun Conventional Buoy Mooring. Kustu manutensaun iha Betano mós boot tebes, hanesan informasaun ne’ebé hato’o hosi própria empreza no koñesimentu EDTL,E.P nian,” nia hateten tán.
Kona-bá assuntu ne’e, Vise-Ministru Asuntu Parlamentár Adérito da Costa Hugo seidauk fó resposta tanba la marka prezensa iha plenária.
Jornalista Estajiária: Zita Menezes
