Hatutan.com, (04 Abríl 2024), Díli—Governu haruka ona proposta Lei alterasaun daruak hosi Lei númeru 8/2009 15 Jullu, Comissão Anti Corrupção (CAC, sigla portugés) bá Parlamentu Nasionál (PN).
“Alterasaun bá Lei CAC nian haruka tiha ona bá Parlamentu Nasionál. Lei ne’e to’o bá iha Parlamentu Nasionál, Prezidente Parlamentu Nasionál asina, tenke diksute, tenke rona malu depois mak ita akompaña,” Primeiru-Ministru, Kay Rala Xanana Gusmão hateten iha Palásiu Prezidensiál Nicolau Lobato Bairru-Pité, Kinta (04/04/2024).
Lee Mós: FRETILIN Husu Altera Uluk Lei CAC Hafoin Avansa bá Eleisaun Komisáriu Foun
Antes ne’e, Prezidente Komisaun A trata asuntu Justisa no Konstitusionál iha PN, Patrocínio dos Reis Fernandes hateten, PN hein Governu aprezenta proposta Lei ba alterasaun daruak hosi Lei númeru 8/2009 15 Jullu, ne’ebé antes ne’e Governu aprova iha reuniaun Konsellu Ministru (KM).
Iha 27 Marsu 2024, Governu liu hosi Reuniaun Konsellu Ministru (KM), aprova projetu Proposta Lei, ne’ebé aprezenta hosi Ministru Prezidénsia Konsellu Ministru, kona-bá alterasaun daruak hosi lei númeru 8/2009, loron 15 Jullu.
Jornalista: Vito Salvadór