PN Sei Bolu Ministra Saúde no MAPPF Hodi Diskute Medida Kombate Virus Rabies

Hatutan.com, (05 Abríl  2024), Díli– Parlamentu Nasionál (PN), Tersa semana oin, (09/04/2024), bolu Ministra Saúde, Élia A.A dos Reis Amaral  no Ministru Agrikultura Pekuária, Peska no Floresta (MAPPF), Marcos da Crus, hodi halo diskusaun kona-bá medida sira kombate virus Rabies ne’ebé agora daudaun mosu iha Rejiaun Admistrativu Oé-Cusse Ambeno (RAEOA).

Lee Mós: PN husu Governu Halo Prevensaun Urjente Hasoru Virus Rabies iha RAEOA

Membru Komisaun F trata asuntu Saúde, Igualdade Jéneru no Seguransa Sosiál, Maria Teresa Gusmão. Foto/Tome da Silva

Membru Komisaun F trata asuntu Saúde, Igualdade Jéneru no Seguransa Sosiál, Maria Teresa Gusmão, hateten virus rabies ne’ebé mai hosi animal ka asu ne’e hamate ona sidadaun ida iha RAEOA  no nia númeru aumenta bá beibeik.

“Lidér bankada sira, deside ona atu antisipa lalais ida-ne’e hodi halo pedidu bá membru Governu liuliu Ministériu Saúde (MS) ho Ministériu Agrikultura Pekuária, Peska no Floresta (MAPPF) atu mai iha Parlamentu hodi halo esplikasaun medida sira kombate virus rabies ne’e rasik,” Deputada Maria Teresa Gusmão haktuir bá jornalista sira  iha PN, Sesta (05/04/2024).

Nia haktuir iha audiénsia ne’e ministériu-rua ne’e sei esplika no klarifika pasu prevensaun bá virus refére. Virus ne’e perigu tebes, presiza Governu halo prevensaun, hodi nune’e labele hada’et bá munisípiu sira seluk.

Reprezentante Povu ne’e mós haktuir parté Ministériu Saúde prepara ona vasinasaun atu nune’e bele antisipa no kombate virus rabies iha Timor-Leste.

Dadus ne’ebé iha katak númeru pasiente pozitivu virus Rabies sa’e ona bá na’in-21  no pasiente na’in-ida (1) lakon vida.

Jornalista Estajiária: Zita Menezes