Prezidente Repúblika Bolu Vise-PM Na’in-rua Ko’alia Asuntu Ekonomia no Sosiál

Hatutan.com, (08 Abríl 2024), Díli- Prezidente Repúblika (PR), José Ramos-Horta, Segunda (08/04/2024),  bolu urjente Vise-Primeiru-Ministru no Ministru Koordenadór ba Asuntu Ekonomia no Ministru Turizmu no Ambiente, Francisco Kalbuadi Lay ho Vise-Primeiru-Ministru no Ministru Koordenadór ba Asuntu Sosiál no Ministru Dezenvolvimentu Rurál ho Abitasaun Komunitáriu, Mariano Asanami Sabino, hodi ko’alia kle’an liu kona-bá asuntu ekonomia no sosiál ne’ebé importante bá povu nia moris.

Lee Mós: Governu Tenke Investe iha Diversifikasaun Ekonómia Rai-Laran

Atividade merkadu iha Suku Kairui, Postu Administrativu Laleia, Munisípiu Manatuto. Foto/Rogério Pereira Cárceres

Hafoin enkontru ne’e, Vise-Primeiru-Ministru no Ministru Koordenadór ba Asuntu Ekonomia no Ministru Turizmu no Ambiente, Francisco Kalbuadi Lay  informa bà jornalista sira iha Palásiu Prezidensiál, katak enkontru ne’e nu’udár priviléjiu no onra boot, Prezidente Repúblika fó hanoin bá interese Estadu nian no mós servisu Governu nian rasik liga ho asuntu ekonomia no sosiál.

“Ami na’in rua hanesan Ministru Koordenadór, Vise-Primeiru-Ministru Assanami hanesan Koordenadór ba Asuntu Sosiál no ha’u rasik hanesan Koordenadór ba asuntu Ekonomia, ami relata ami nia servisu no mós simu orientasaun lubuk ida mai hosi nai Prezidente Repúblika atu la’o bá oin tuir hotu-hotu nia hakarak,” Francisco Kalbuadi Lay informa.

Iha sorumutuk ne’e, paste sira ko’alia mós asuntu oin-oin liga ho ekonomi no sosial inklui asuntu importante sira seluk ne’ebé di’ak tebe-tebes no Xefe Estadu fó orientasaun no dalan di’ak atu nune’e lori fila bá hamutuk ho membru Governu sira seluk atu bele realiza programa ne’ebé mak konkretu bá oin.

Vise-Primeiru-Ministru no Ministru Koordenadór ba Asuntu Sosiál no Ministru Dezenvolvimentu Rurál ho Abitasaun Komunitáriu, Mariano Assanami Sabino hateten e Prezidente Repúblika ko’alia ho sira na’in-rua  liga mós ho interese povu nian no interese nasionál, tanba sira  sei informa mós ba Xefe governu oinsá mak iha koordenasaun di’ak liu bá oin.

“Vizaun Prezidente Repúblika nian, ami sei realiza no garantia para oinsá koordenasaun bele la’o di’ak para bele garante saida mak Prezidente Repúblika hanoin,” Mariano Assanami Sabino haktuir.

Jornalista: Vito Salvadór