Xanana Husu Empreza Telemor Hadi’a Rede Internet

Hatutan.com, (09 Abríl 2024), Díli—Primeiru-Ministru (PM), Kay Rala Xanana Gusmão hala’o enkontru ho Chief Executive Officer (CEO) Viettel Timor, Tran Van ne’ebé atualiza programa no servisu sira hosi empreza telekomunikasaun ne’e, iha Palásiu Governu, Segunda (08/04/2024).

Primeiru-Ministru (PM), Kay Rala Xanana Gusmão hala’o enkontru ho Chief Executive Officer (CEO) Viettel Timor, Tran Van ne’ebé atualiza programa no servisu sira hosi empreza telekomunikasaun ne’e, iha Palásiu Governu, Segunda (08/04/2024). Foto: Média PM.

“Ami kontente tebes bele mai hasoru Primeiru-Ministru hodi hato’o relatóriu servisu Telemor nian nune’e mós ho ami-nia servisu dijitalizasaun no teknolojia. Ami mós ko’alia kona-bá planu Telemor nian bá tinan oin,” Hatutan.com sita deklarasaun Tran Van iha komunikadu.

Lee Mós: Telemor Rekoñese Fornese Liña Internet La Saudável ba Kliente TL

Nia informa, Primeiru Ministru rasik hateten katak Telemor tenke hadi’a nia koneksaun di’ak liu-tán hodi lori nia koneksaun no fasilidade dijitál bá to’o komunidade iha baze iha teritoriu TL.

CEO Viettel Timor ne’e dehan, daudaun ne’e 96% populasaun Timor-Leste mak assesu ona koneksaun Telemor nian no Telemor foku hela hodi implementa atividade rua mak hanesan instalasaun tower iha territóriu tomak, inklui halo koneksaun internasionál.

“Los duni katak ami hetan preokupasaun balun hosi públiku kona-bá koneksaun internet, maibé ida-ne’e tanba ami hola fila-fali hosi Indonézia nune’e bainhira sira-nia internet monu automatimente iha ne’e mós afetadu,” nia klarifika.

CEO Viettel Timor ne’e iha esperansa katak ho projetu Governu nian kona-bá Fibra Óptika ne’ebé sei mai bele hadi’a liután liña koneksaun iha Timor-Leste.

Lee Mós: Problema Internet, SACOMTEL Konsidera TT-Telemor-Telkomcel Hanoin De’it Lukru

Jornalista: Rogério Pereira Cárceres