CCI-TL Preokupa Foos Subsídiu Fa’an iha NTT, Governu Seidauk iha Informasaun

Hatutan.com, (17 Abríl 2024), Díli— Câmara Comercio Indústria Timor-Leste (CCI-TL) preokupa ho foos subsídiu ne’ebé kamioneta sira tula hosi Timor-Leste (TL) no lori sai bá fa’an iha Provínsia Nusa Tenggara Timur (NTT), Repúblika Indonézia (RI).

Câmara Comercio Indústria Timor-Leste (CCI-TL), Jorge Manuel de Araújo Serrano. Foto: Média PR.

Preokupasaun ne’e hato’o hosi Prezidente CCI-TL, Jorge Manuel de Araújo Serrano hafoin sorumutu ho Prezidente Repúblika, José Ramos-Horta, iha Palásiu Prezidensiál Nicolau Lobato Bairru-Pité, tersa (16/04/2024).

Lee Mós: CCI-TL Laiha Kompeténsia Hatun Folin Foos

“Problema ida ne’ebé presiza atu hatene maka kamioneta sira ne’ebé mai hosi fronteira tula sasan hosi NTT mai fa’an iha ne’e, fila-fali tula ho foos subsídiu sira ne’e bá fa’an iha NTT. Ne’ebé husu bá hotu-hotu atu akompaña mós situasaun sira ne’e,” Jorge Manuel de Araújo Serrano hateten.

Preokupasaun ne’e emprezáriu timoroan ne’e hato’o hodi responde pergunta jornalista sira nian kona-bá CCI-TL nia intervensaun bá problema folin foos ne’ebé kontinua sa’e maski Governu fó ona subsídiu bá empreza lima ho millaun $4 hodi normaliza folin.

Tanba ne’e nia dehan, CCI-TL laiha kompeténsia atu hatún folin foos ne’ebé oras-ne’e kontinua sai preokupasaun povu Timor-Leste no mundu.

MKI Seidauk iha Informasaun

Governu liu hosi Ministériu Komérsiu Indústria (MKI), seidauk iha informasaun kona-bá foos ne’ebé Governu fó subsídiu no CCI-TL indentifika fa’an to’o iha NTT.

Ministru Komérsiu Indústria, Filipus Nino Pereira promete sei halo konfirmasaun ho ekipa MKI nian ne’ebé destaka iha fronteira hodi identifika assuntu ninia verasidade.

“Hau hanoin ita sei buka-tuir. MKI konsidera hahalok ida-ne’e tanba iha ema balun ne’ebé hakarak uza oportunidade subsídiu hodi buka lukru,” Ministru Filipus Nino Pereira hateten bá Hatutan.com iha Palásiu Governu, Kuarta (17/04/2024).

Governante ne’e dehan, bainhira identifika iha emprezáriu balun maka involve iha hahalok ne’e, MKI sei haree desizaun ne’ebé forte hodi bele hasoru emprezáriu hirak ne’e bazeia ba Dekretu Lei pressu justu atu nune’e lebele repete tán.

Jornalista: Vito Salvadór/Leopoldina de Carvalho