APC Sei Instala Postu Bombeiru Hitu iha Área Protejida Sira no Rekruta Kadete Na’in-146

Hatutan.com, (25 Abríl 2024), Díli-Ministériu Interiór liuhosi Autoridade Protesaun Sívil (APC-sigla portugés) sei instala ka estabelese tán postu bombeiru hamutuk hitu (7) bá iha área protejida sira iha territóriu nasionál, nune’e bainhira mosu inséndiu ruma, membru sira bele responde no kombate.

Lee Mós: Funsionáriu Bombeiru Na’in-96 Simu Posse

Funsionáriu Bombeiru na’in-10 ne’ebé destakadu iha Unidade Espesiál Autoridade Protesaun Sívil (APC-Sigla Português), iha Segunda 12 Juñu, partisipa iha ezersísiu tun-tali ho objetivu atu halo salvamentu bá vítima sira bainhira enfreta dezastre. Foto/dok.APC.

“Ita rekoñese katak, ita menus rekursu. Mais ita iha planu 2024, ita monta tán postu hitu bombeiru iha Timor-Leste liu-liu bá área protejidu sira,” Sekretáriu Estadu bá Protesaun Sívil (SEPS), Domingos Mariano Reis, informa asuntu ne’e bá jornalista sira, hafoin seremónia komemorasaun aniversáriu ezisténsia Bombeiru nian da-XXIV  (25 Abríl 2000- 2024) iha resintu edifísiu  APC-Caicoli, Díli, Kinta (24/04/2024).

Área sira ne’ebé identifikadu atu urjente monta rekursu bombeiru, mak hanesan Ramelau, sei monta iha postu Hatubuilico, hodi responde no kombate insendiu no seluk fali instala iha Bobonaro, Ataúro, Uatucarbau-Viqueque, no  Natarbora-Manatuto.

Rekruta tán Kadete 146

Sekretáriu Estadu Domingos Mariano Reis, informa kona-bá planu SEPS nian ne’ebé mak fiksa tiha ona katak, iha tinan ne’e sei loke anúnsiu públiku ka vaga, hodi rekruta tán kadete foun Bombeiru hamutuk na’in-146, hodi reforsa servisu atendimentu públiku.

Kona-bá orsamentu bá halo rekrutamentu nian, SEPS Mariano Reis, dehan, depende bá grau, nível no pozisaun ne’ebé aplikante sira submete iha dokumetu laran.

Bombeiru Kompleta Ezisténsia Dala-24

SEPS Mariano Reis, hatutan, ohin, 25 fulan-Abríl 2024, Bombeiru Timor-Leste, realiza ninia seremónia aniversáriu ezisténsia nian ne’ebé kompleta ona dala-24. Ezisténsia Bombeiru, primeiru, atu serbí no proteje povu Timor-Leste hosi ameasa dezastre nian, tantu ameasa iha terrestre, aéreu, no dezastre iha marítima.

Iha aniversáriu Bombeiru Timor-Leste nian ne’e, SEPS Mariano Reis husu membru sira atu mantein profesionalizmu ne’e haree hosi pontu importante tolu mak hanesan, rekursu umanu, rekursu finanseiru, no rekursu fasilidade.

Intermu kapasidade finanseiru nian, bele hatete katak, maske ki’ik, maibé la’ós sai barreira ka hanesan impedimentu bá Bombeiru, maibé oinsá maka atu la’o bá oin nafatin.

“Ita prontu hela, kualker tempu, ho rekursu ne’ebé iha, ita la’o dadauk, no politikamente, ita mós iha vizaun ne’ebé di’ak, para bele kompete mós ho rai sira selseluk,” Mariano Reis tenik.

Jornalista: Rogério Pereira Cárceres