Candice Teves Husu Estadu TL Salva Nia Kaben Fujitivu Arnolf Teves

Hatutan.com, (12 Maiu 2024), Díli—Candice Teves husu Estadu Timor-Leste (TL) atu salva nia kaben Fujitivu Arnolf Teves Jr hodi aseita no aprova pedidu aziliu politiku ne’ebé fujitivu ne’e husu.

Candice Teves hanesan kaben hosi fujitivu Arnolf Teves Jr hamutuk ho nia advogadu José Ximenes realiza konferénsia imprensa iha Timor Lodge, sábadu (11/05/2024) husu Estadu Timor-Leste (TL) atu salva nia kaben. Foto espesiál.

Candice Teves hato’o pedidu ne’e liu hosi konferénsia imprensa iha Timor Lodge, sábadu (11/05/2024), ne’ebé husu atu Estadu TL aprova pedidu aziliu politiku ne’ebé nia kaben husu tanba ida-ne’e bele salva nia vida hosi mate.

Lee Mós: Fujitivu Arnolfo Teves Jr Submete Rekursu bá TR

“Ha’u hakarak ko’alia bá Timor-Leste, ha’u-nia oan sira lakon ona maun-alin na’in-ida. Ha’u ta’uk se ha’u-nia la’en fila-fali bá rai-Filipina ha’u fiar duni katak nia sei mate tanba ema sei oho nia. Tanba ne’e ha’u husu bá Timor-Leste atu salva ha’u-nia la’en nia moris. Nu’udar inan no feen, ha’u la hanoin katak ha’u-nia família bele mate tán. Iha família laran, ha’u fiar duni katak ida-ne’e sei akontese bá ha’u-nia la’en se nia fila-fali bá uma. Ha’u hein katak Timor-Leste bele fó benefísiu bá nia tanba nia la’ós kondenadu,” Candice Teves husu.

Iha fatin hanesan, defeza Fujitivu Arnolf Teves Jr, José Ximenes hateten, liga ho prossesu fujitivu Arnolf Teves Jr nian, hanesan Ministru Justisa ko’alia ona iha parte balun katak, prossesu ne’e tuir-mai sei iha faze administrativu, ne’ebé Governu sei foti desizaun.

hanesan defeza lakohi halo buat ruma, hanesan ho presaun Governu, maibé hanesan advogadu hosi fujitivu Arnolf Teves Jr, halo introdusaun hodi hateten katak, importante tebes bá Timor-Leste atu kumpre Konstituisaun Repúblika no mós konvesaun tratadu sira internasionál sira, ne’ebé Timor-Leste opta, ne’ebé sempre tane aas prinsipiu no valores bá direitus umanus nian, liu-liu direitu bá vida.

“Nia mai ne’e primeiru tanba nia vida iha perigu. Tanba ne’e ohin nia kaben Candice Teves  dehan nia mai atu husu salva vida. Ha’u lembra de’it, banhira nia hato’o deklrasaun, nia dehan nia mai Timor-Leste hodi buka salva nia vida.  Tanba ita iha ema lider boot na’in-rua ne’ebé mak simu Novel da Paz, pais ne’ebé hahi no tane respeitu direitus umanus,” José Ximenes hateten.

Prosesu ne’e la’o hela, no ania hatutan, agora daudaun iha hela baze ida, hanesan Ministru Justisa dehan, iha prosesu agora kliente iha hela prizaun preventiva, maibé nia prosedimentu tenke faze rua, hanesan mak hanesan faze detensaun ida ne’e atu hein pedidu formal bá tindes tradisaun, no segundu depois deside faze administrativu Governu tenke deside, se depois kazu la halo nusa tenke ba fali tuir mai mekanizmu Judisiál.

Tanba ne’e, hanesan defeza hanoin katak bainhira Timor-Leste hanesan pais demokratiku ne’ebé harii respeitu prinsipiu ne’e, tau bá iha konsiderasaun, tanba vida umana mak iha konstituisaun no konsagra nu’udár valor ne’ebé aas liu valor sira seluk.

Fujitivu Arnolfo Teves Jr to’o iha Timor-Leste iha 27 Abril 2023, liu deit loron ida depois husu kedan asiliu politiku bá Estafu Timor-Leste.

Jornalista: Vito Salvadór