Bankada CNRT Husu PNTL Buka no Kaptura Autór Prodús Osan Falsu

Hatutan.com, (14 Maiu 2024), Díli- Membru Parlamentu Nasionál husi Bankada  CNRT, Cedelizia Faria dos Santos husu Ministériu Interiór  (MI), Polísia Nasionál Timor-Leste (PNTL), Polísia Sientífika  Investigasaun Kriminál (PCIC, sigla portugés) atu halo investigasaun imediata no kaptura autór  sira prodús osan falsu bá moeda 50 sentavu ne’ebé daudaun ne’e espalla iha Timor-Leste.

Lee Mós: BCTL Rekolla Moeda Falsu Sentavu 50 Besik Ona $400

Moeda Timor Leste nian. Foto/Repro

Dadus osan falsu ne’ebé fó sai husi Banku Sentral Timor-Leste (BCTL) katak to’o fulan-Maiu 2024 katak BCTL konsegé  rekolla ona osan falsu bá moeda 50 sentavus ho nian kuantidade kuazé  400 ho nia valór osan hamutuk $800.

“Montante ida-ne’e tuir ha’u haree signifikante tebes no ha’u triste mak to’o ohin loron autór ne’ebé produz osan falsu ne’e parte kompetente seidauk identifiká no ka’er,” Deputada Cedelizia Faria haktuir iha nian intervenzaun Plenária, Segunda  foin lalais ne’e.

Nia afirma, osan falsu ne’e produz iha rai-laran ka tama husi estranjeiru no karik prodúz iha rai-laran seraké ema sira ne’e la konsegé detekta. Karik nia tama husi rai-li’ur oinsá seguransa sira fronteira no aeroportu no portu  sira kontrola hodi osan ne’e bele tama fali mai Timor-Leste.

Nia rekomenda bá BCTL kontinua halo sosializasaun  no divulgasaun bá osan falsu sira ne’e atu nune’e komunidade sira hetan karik bele entrega no halo keixá.

Vise-Ministru asuntu parlamentár Adérito Hugo da Costa  promete hato’o kestaun ne’e bá parte relevante sira hodi buka solusaun.

Jornalista Estajiária: Zita Menezes