PLP husu Halo Revizaun bá Lei Komunikasaun Sosiál

Hatutan.com, (14 Maiu 2024), Díli– Bankada Parlamentar Partidu Libertasaun Populár (PLP)  hosu bá Governu atu halo ona revizaun bá Lei-Komunikasaun Sosiál.

Lee Mós: SEKOMS Rekoñese Tama Redasaun RTTL,E.P no Dehan Atu Halo Loos Notísia

Xefe Bankada PLP iha PN, Maria Angelina Sarmento. Foto/Tome da Silva.

Xefe Bankada Parlamentár PLP, Deputada Maria Angelina Sarmento, iha plenária PN, Segunda (13/05/2024), hateten, defeza bá liberdade imprensa sira, PLP ezije bá Governu atu halo revizaun bá lei sira ne’ebé restritivu no kompromisiu ida atu proteje direitu husi jornalista sira-nia liberdade bá asesu informasaun (inegosiavel) hodi asegura sentidu transparánsia.

Biban ne’e,  Vise-Ministru asuntu Parlamentár Adérito Hugo da Costa nu’udár antigu jornalista Timoroan hosi Indonézia nia tempu no hanesan mós proprietáriu bá Jornál Diáriu Timor Post, hateten kona-bá índise liberdade Imprensa mundiál ne’ebé rezultadu Timor-Leste nia  ranking iha TOP  10  iha tinan 2023 monu bá ranking 20 iha 2024 karik tanba iha intervensaun polítika iha independénsia no liberdade jornalista sira-nian, maka Parlamentu Nasionál bele bolu parte relevante sira atu rona tanbasá iha intervensaun podér polítiku sira iha independénsia editorial, liuliu iha mídia públiku hanesan RTTL,E.P ho Ajénsia Tatoli,i.P

“Karik iha presaun bá politíka redasaun  no liberdade editoriál,  Parlamentu Nasionál bele bolu prezidente  RTTL, E.P no prezidente Tatoli, I.P para husu karik ema ruma halo presaun  bá sira nian politíka redasaun bá liberdade editoriál,” Adérito Hugo antigu jornalista  jornál Suara Timor-Timur (STT) ne’e hateten.

“Atu ita bele hatene karik iha ema ruma  hapara ema labele ko’alia liberdade imprensa iha entidade rua ha’u temi ne’e, bele bolu Prezidente RTTL, E.P no Prezidente Tatoli, I.P atu husu sira tanbasá mak índise  ne’e tuun iha tinan 2024, Governante ami hakarak rona karik iha Governante ruma halo politíka redasionál. Tanba ne’e tuun maka’as loos husi ranking 10 bá rangking 20,” Adérito Hugo da Costa  tenik  iha plenária PN.

Jornalista Estajiária: Zita Menezes