Restaurasaun Independénsia bá Dala-22, PN Husu Timoroan Tomak Halo Reflesaun

Hatutan.com, (17 Maiu 2024), Díli—Parlamentu Nasionál (PN) liuhosi deputada bankada FRETILIN, Nurima Ribeiro Alkatiri husu timor oan tomak atu halo reflesaun bá situasaun hotu-hotu ne’ebé Timor-Leste konsege ultrapassa iha nasaun soberanu ida-ne’e.

Deputada bankada FRETILIN Nurima Ribeiro Alkatiri. Foto dok privada Nurima.

Deputada ne’e husu liga ho komemorasaun loron restaurasaun independénsia bá dala-22 (20 maiu 2002-20 maiu 2024).

Lee Mós: Timor-Leste “Dezafiu no Oportunidade” Iha Tinan 20 Restaurasaun Independénsia

Nia dehan, komemorasaun restaurasaun independénsia loron 20 Maiu 2002 nu’udár loron importante bá Timoroan hotu no bá povu Maubere.

Ho luta ne’ebé forti ho sakrafísiu boot hosi povu no luta na’in sira konsegé hetan hodi bele permite katák Timor-Leste hamriik no moris iha liberdade.

“Ha’u hakarak fó parabéns bá povu maubere no buibere tomak.  Husu hotu-hotu halo refleksaun bá saidá mak ita konsegé hetan bá sussesu sira ne’ebé nu’udár povu no nasaun soberanu. Ita bele halo reflesaun bá saidá mak ita presiza alkansa. Hamutuk ita bele iha forsa hodi dezenvolve nafatin ita nia rai,” deputada Nurima Alkatiri hateten iha PN, sesta (17/05/2024).

Iha fatin hanesan Xefe bankada CNRT, deputadu Duarte Nunes hateten, Timor-Leste atu komemora hikas tinan 22 restaurasaun independénsia 20 Maiu 2002, husu parte hotu-hotu esforsu hamutuk atu dezenvolve rai ne’e ba oin.

“Ita tenke hamutuk hatudu ita nia ukun an bá mundu katak agora mak ita la’o tuir loloos buat ne’ebé mak ita hakarak. Ita la’o ona tinan 22, tempu la’o barak no ita kontinua dezenvolve rai ne’e bá interese povu nian,” nia hateten.

Nia iha esperansa boot katak, iha komemorasaun tinan 22 restaurasaun independénsia ne’e no tinan oin Timor-Leste bele tama ona ASEAN hodi hatutdu katak Timor Leste hetan duni konfiansa hosi mundu ba ninia ukun rasik an.

Jornalista estajiária: Zita Menezes