Inaugural Flight Aero Dili bá Oé-Cusse, PM Xanana ho Pasajeiru 162 Tuun ho Susesu iha Aeroportu Internasionál Rota do Sândalo

Hatutan.com, (18 Maiu 2024), Oé-Cusse- Primeiru-Ministru Kay Rala Xanana Gusmão hamutuk ho sidadaun nasionál no estranjeiru hamutuk  na’in-162 sai pasajeiru  dahuluk iha inaugural flight aviaun komersiál Aero Díli bá Rejiaun Administrativu  Oé-Cusse Ambeno.

Lee Mós: 18 Maiu 2024, Aero Dili Lansa Vou Dahuluk Díli-Oecusse

Anaugural flight Aero Dili bá Oé-Cusse, Sábadu (18/05/2024). Foto/Vito Salvadór

Iha Inaugural flight ka lansa vou dahuluk aviaun timoroan nian ho bandeira RDTL bá rai-ketan Oé-Cusse ne’e hanesan parte kompromisu empreza aéreu nasionál Aero Dili nian ho Governu Timor-Leste, liuliu Autoridade Rejiaun Administrativu Espesiál Oe-Cusse Ambeno atu garante koletividade  aéreu hodi substitui aviaun ZEESM ne’ebé prezidente Autoridade RAEOA, Rogério Tiago Lobato  deside suspende operasaun tanba presiza halo investigasaun bá prosesu balun.

Aviaun Aero Dili sai husi Aeroportu Internasionál Prezidente Nicolau Lobato, Comoro, hale’u tuku 07:30 dadeer  no to’o iha Aeroportu Internasionál Rota do Sândalo hale’u tuku 08:00  dadeer. Distánsia vou Díli-Oe-Cuse ho durasaun oras entre minutu 20 to’o minutu 30.

Jornalista Hatutan.com, Vito Salvadór ne’ebé akompaña inaugural flight aviaun Airbus A320 Aero Dili hosi Díli bá Oé-Cusse  nota  katak bainhira aviaun Aero Dili landing ka tun iha pista Aeroportu Internasionál Rota do Sândalo, Primeiru-Ministru  Kay Rala Xanana Gusmão ne’ebé akompaña husi membru governu sira balun hamutuk ho pasajeiru nasional no internasionál sira basa-liman ho kontente iha aviaun laran.

Bainhira aviaun Aero Dili tama bá arredores Aeroportu Internasionál Rota do Sândalo nian Prezidente Autoridade RAEOA, Rogério Tiago de Fátima Lobato, hamutuk ho funsionáriu no Oé-Cusse oan sira hamriik ho ksolok no orgullu hodi basa-liman no kontinua rega ho bee husi bombeiru ne’ebé hatudu katak Aviaun Aero Dili ofisiálmente halo ona nia vou rotina Díli bá Oe-Cusse no mós Oe-Cusse mai Dili tuir oráriu ne’ebé determina ona.

Hafoin simu iha arredores liur Aeroportu Internasionál Rota do Sândalo, Prezidente Autoridade RAEOA konvida kedas Primeiru-Ministru  Xanana Gusmão no na’in bá empreza Aero Dili, Lourenço de Oliveira hodi tama bá aeroportu laran no simu ho kultura Atoni oan sira-nian no tara tais inklui lia-nain sira halo dadolin ho lian Baikenu no tebe-tebe ho ritmu tradisional Oé-Cusse nian hodi lori bainaka no konvidadu onra sira bá fatin serimónia.

Oé-Cusse oan sira ho entuziazmu simu operasaun dahuluk aviaun Aero Dili bá Oé-Cusse ho serímonia kulkturál ne’ebé hala’o iha Aeroportu Internasionál Rota do Sandalo, Oé-Cusse, Sábadu (18/05/2024). Foto/Vito Salvadór

Iha observasaun ne’ebé Hatutan.com iha nota katak estudante no komunidade sira entuziazmu hodi asiste serimónia lansamentu primeira vou Aero Dili nian no  kontente tamba RAEOA bele iha ona transporte aeréu ne’e bele hafasil konetividade populasaun Oé-Cusse nian mai kapital nasaun no bele fasilita mós turista sira tantu husi rai-laran no estranjeiru  vizita Oé-Cusse di’ak liután.

Iha fali  loron tuir mai, 19 fulan-Maiu ne’e, aviaun Aero Dili sai husi Díli tuku 07:00 dadeer no fila fali husi Oé-Cusse tuku 09:30 dadeer.

Kona-bá presu tikete promosaun nian iha inaugural flight ne’e sei fa’an limitadu ho presu $20 kada pasajeiru Dili-Oe-Cusse bá total pasajeiru na’in-40 de’it. Ho nune’e, presu tikete bá-mai Dili-Oe-Cusse $40 kada pasajeiru.

Antes ne’e, Iha loron 23 fulan-Janeiru 2023, empreza Aero Dili inaugura ligasaun aéreu ba dahuluk entre Dili-Denpasar, Indonézia  liuhosi serimónia ne’ebé hala’o iha Otel Timor partisipa husi Primeiru-Ministru atuál ne’ebá Taur Matan Ruak ho membru VIIII Governu Konstitusionál sira.

Iha loron 20 fulan-Marsu 2023, aviaun Airbus A320 Aero Dili nian halo inaugurasaun iha Aeroportu internasionál Prezidente Nicolau Lobato no vou dahuluk bá Denpasar-Indonézia iha loron 28 fulan-Marsu 2023.   

Iha fali loron 24 fulan-Fevereiru 2024, aviaun Aero Dili ho na’in Timoroan, Lourenço de Oliveira,  lansa vou dahuluk bá Singapura ne’ebé Prezidente Repúblika, José Ramos-Horta ho Ministru Negósiu Estranjeiru no Kooperasaun, Bendito Freitas sai   pasajeiru dahuluk iha  lansamentu vou ne’e.

Jornalista: Vito Salvadór