Governu Timor-Leste Deside Halo Estradisaun bá Fujitivu Arnolfo Teves Jr

Hatutan.com, (20 Maiu 2024), Díli- Governu Timor-Leste liu husi Ministériu Justisa (MJ) deside halo estradisaun bá Fujitivu Arnolfo “Arnie” Teves Jr hodi fila bá kumpri justisa iha nia país orijen.

Lee Mós: Fujitivu Arnolfo Teves Jr La Elijivel bá Azilu Polítiku iha Timor-Leste

Fujitivu Arnolfo “Arnie” Teves Jr. Foto/Dok. Espesiál

Ministru Justisa, Sérgio Hornai ba jornalista sira iha Palásiu Prezidensiál, Segunda (20/05/2024), hateten semana sira liu bá, depois rona, tetu no halo leitura ida kle’an kona-bá lei sira ne’ebé Timor-Leste iha, no rona parte hotu, liu-liu husi parte autoridade sentral, iha aspetu balun ne’ebé Ministériu Justisa halo aproximasaun iha ne’ebá, aproximasaun dahuluk mak haree husi perspetiva ida husi prosesu Judisiál nian, tamba dezde inísiu bainhira Fujitivu Arnolfo Teves Jr hetan tiha detensaun, prosesu Judisiál sira kumpre hotu ona no ohin loron iha hela sela detensaun provizóriu no husi ne’ebá Prokuradór Jerál Repúblika hanesan órgaun sentrál bá iha materiál kriminál nian halo servisu hamutuk ho Tribunál sira no advogadu sira halo hotu servisu ne’ebé mak iha no ikus mai verifika no informa mai iha Ministériu Justisa (Governu) para atu bele hola desizaun iha loron sanulu (10) nia laran tuir Timor-Leste nia lei kooperasaun internasionál bá iha penál nian ne’ebé fó kbiit ba iha Governu liu husi Ministériu Justisa atu halo desizaun.

Ministru Sergio Hornai hateten desizaun bá estradisaun ne’e halo tiha ona iha loron 13 fulan-Maiu liubá, no hato’o ona ba iha Prokuradór Jerál Repúblika nia Gabinete para atu halo prosesu Judisiál tuir lei haruka.

“Desizaun hanesan ita-boot sira hatene tetu áa iha sirkunstánsia sira hotu-hotu, tetu ba lei penál ne’ebé aplika iha Filipina, haree mós bá iha prosesu sira tomak, haree ba iha matéria sira liu-liu kona-bá aplikasaun pena abstrata nian, katak momentu ne’e  laiha pena de morte no pena prizaun perpétua  no hirak ne’e hotu reuniaun mos sirkunstánsia hotu-hotu no haree bà importánsia Timor-Leste nian hanesan membru observador ba iha ASEAN, ha’u hanesan Ministru responsavel partilla katak ha’u halo desizaun ida hodi admite atu halo estradisaun bá Fujitivu Arnolfo Teves Jr,” Ministru  Sérgio Hornai esplika.

Ministru Justisa hatutan reuni kondisaun hotu-hotu, sei halo servisu hamutuk depois prosesu sira ne’e konklui hotu, Autoridade Judisiál sira konklui, Tribunál halo fali apresiasaun bá iha buat sira ne’e hotu, ikus mai sei haruka Fujitivu Arnolfo Teves Jr fila ba nia país orijen.

“Ministériu Públiku iha prazu durante oras 48 nia laran (loron rua), para atu halo prosesu sira estradisaun nian,” Nia subliña.

Iha loron 13 fulan-Maiu 2024, Prezidente Repúblika José Ramos-Horta deklara ona katak fujitivu Arnolfo Teves Jr la elejivel atu hetan azilu polítiku iha Timor-Leste no tenke halo estradisaun fila ba nia país orijen.

Jornalista: Vito Salvadór