Harii Tan Merkadu Ida iha Díli Hodi Akumula Vendedór sira

Hatutan.com, (21 Maiu 2024), Díli- Haree bá kondisaun merkadu rua iha Díli; Manleuana ho Taibessi, la konsege akumula hotu vendedór sira, liuliu hirak ne’ebé kontinua utiliza espasu públiku hodi halo atividade, hanesan iha Elemloi-Delta nian, Kampu Baru-Comoro, iha Terminal Becora ho mós iha Audian nian, maka Bankada Parlamentár KHUNTO husu Governu harii tán merkadu hodi bele akumula  vendedór sira  ne’e.

Lee Mós: Governu Halo Adjudikasaun Direita Projetu Reabilitasaun Merkadu Taibesi ho Manleu ho Kustu $200.000

Atividade negosiu iha Merkadu Taibessi, Díli, Kuarta, 16 Agostu 2023. Foto/Lazaro Pereira Quefi

Liuhusi deklarasaun polítika Bankada KHUNTO nian iha plenária PN, Tersa (21/05/2024), hateten Governu presiza harii tán merkadu foun ho kondisaun di’ak, atu nune’e fa’an na’in sira, bele fa’an sira-nia sasan iha fatin disponibilizadu, atu nune’e sira labele fa’an iha fatin públiku.

Xefe Bankada KHUNTO António Verdiál de Sousa haktuir nu’udár reprezentante povu husu mós bá autóridade Munisípiu Díli tau  atensaun bá populasaun ne’ebé fa’an iha fatin públiku, liuliu iha estrada ninin sira.

Nia hateten,  negosiante sira ne’e presiza duni buka moris atu bele sustenta sira-nia nesesidade ekonomia uma-laran nian, maibé la bele fó risku bá ema seluk, tanba bainhira sira okupa tiha espasu públiku hanesan iha Elemlio,  Kampu Baru-Comoro, Audian no Becora, hamosu engarrafamentu ne’ebé bele iha asidente tráfegu.

“Sira esforsu aan hodi hetan osan hodi sustenta sira nian vida, kriá merkadu lokál di’ak ida nune’e fa’an na’in sira fa’an ho forma ne’ebé  ho ijéniku no  kalan sira bele fila bá uma,” Nia  hateten.

Vise-Ministru asuntu Parlamentár Adérito Hugo da Costa, sei hato’o asuntu ne’e bá Ministériu relevante sira hodi buka solusaun bá problema espasu merkadu, hodi nune’e bele akumula hotu negosiante sira.

MCI Kontinua Halo Supervizaun  bá Reabilitasaun Merkadu

Vise-Ministru Komérsiu  no indústria( MKI), Agostu Junior Trindade, hateten progresu reabilitasaun maerkadu rua; Taibessi ho Manleuana kontinua lao no  parte importante ne’ebé sai nu’udár  prioridade mak  kanalizasaun bee-moos, eletrisidade no hariis-fatin.

“Ho osan ne’ebé uitoan kompañia ne’ebe halo ona servisu iha terrenu, aban ka bairua, hau sei bá halo haree servisu hamutuk ho SEATOU ho MAE, ho PAM Díli, ne’ebé servisu ne’e integradu, ami haree hela servisu ida-ne’e,” Vise-Ministru Agusto Junior Trindade hateten  ba jornalista sira iha knar fatin.

Projetu rehabilitasaun merkadu rua ne’e ezekuta hsui kompañia rua hanesan Walgen Walter10 unip.lda responsavel bá merkadu Taibessi no  Rheyna Junior unip.lda bá merkadu Manleuana ho kustu projetu hamutuk $200.000 ho nia kompozisaun Merkadu Taibessi nia kustu projetu  $100.000 no Merkadu Manleuana mós $100.000.

Jornalista Estajiária: Zita Menezes/Leopoldina de Carvalho