PDHJ ho CNC Fasilita Audiénsia Kona-bá Violasaun Direitu Umanu iha Myanmar

Hatutan.com (27 Maiu 2024), Díli—Provedór Direitu Umanu no Justisa (PDHJ, sigla portugés) servisu hamutuk Sentru Nasionál Chega (CNC), Segunda (27/05/2024), iha auditóriu CNC, fasilita audiénsia públika hodi rona grupu sira ne’ebé durante ne’e halo advokasia kona-bá situasaun direitu umanu iha Myanmar.

Lee Mós: TL Kontinua Kondena Konflitu Armadu iha Gaza-Ukránia Inklui Junta Militár Myanmar

PDHJ ho CNC Fasilita Audiénsia Kona-bá Violasaun Direitu Umanu iha Myanmar, SEgunda (27/05/2024). Foto/Elio dos Santos da Costa

Provedór Virgílio da Silva Guterres “Lamukan”. hateten ekipa ne’e hetan akompañamentu Diretór ezekutivu IID  Gus Miclate, Dedy roother,  ne’ebé uluk luta  hamutuk ho Prezidente Repúblika José Ramos-Horta halo kampaña kona-bá luta independénsia Timor nian.

“Sira ho sira nia organizasaun Inisiative for International Dialogue (IID) husi  Filipina, art Asean husi Malázia, Forum Asean husi Tailándia, Progresive Voice husi Myanmar, Sira mai lori sasin sira ne’ebé enfrenta situasaun iha ne’ebá, nune’e PDHJ ho CNC konvida entidade sira, komunidade Timor, estudante sira, sosiedade sivíl atu rona,” Provedór Virgílio da Silva Guterres “Lamukan”.

Virgílio Guterres esplika razaun prinsipál husi audiénsia ne’e hodi hatudu pozisaun Timor-Leste ba kazu iha Myanmar. Hanesan Prezidente Repúblika, José Ramos-Horta ho Primeiru-Ministru (PM), Xanana Gusmão hateten beibeik iha forum iha Timor no mós iha Nasoins Unidas, katak Timor-Leste pro-defeza direitu umanu no demokrasia tanba ne’e mak semináriu ida-ne’e  hakarak hatene kona-bá situasaun iha Myanmar.

Iha biban ne’e Diretór Ezekutivu CNC,  Hugo Maria Fernandes hatutan audiénsia ne’e hanesan solidariedade husi Timor-Leste nian ba nasaun Myanmar ne’ebé apoiu ona Timor-Leste iha prosesu ukun an.

“Ekipa sira ne’e sei enkontru barak ho Primeiru-Ministru, Vise-Primeiru-Ministru, Prezidente Repúblika rasik, no mós atu aprende no hatene oinsá mak ita halo atividade sira kona-bá defende direitu umanu ba promove direitu umanu hodi tulun vítima sira,” Hugo Fernandes hateten.

CNC mós sei fasilita ne’e ekipa hirak ne’e hodi aprende kona-bá oinsá CNC halo diseminasaun informasaun.  Nune’e mós konfirma kona-bá Asian People Forum ne’ebé sei akontese iha fulan-Setembru mai iha Dili hodi akumula ativista husi Asean hodi halo koordenasaun oinsá bele hola parte iha kampaña ba kazu violasaun direitu umanu iha Myanmar.

 Jornalista : Leopoldina de Carvalho