Ekipa Fiskalizasaun Toman Funsionáriu MAPPF Barak Tama Servisu Tarde

Hatuta.com, (31 Maiu 2024), Díli-Ekipa fiskalizasaun husi  Komisaun Anti-Korrupsaun (CAC, sigla portugés), Komisaun Funsaun Públiku (CFP) , Inspetór Jerál Estadu  (IJE) ho Patrimóniu Estadu, Sesta (31/05/2024), halo fiskalizasaun urjente ba Ministériu Agrikultura Pekuária, Peska no Floresta (MAPPF) hodi buka hatene lala’ok servisu funsionáriu sira nian.

Lee Mós: CAC ho CFP Halo Fiskalizasaun bá Instituisaun Governu

Funsionáriu MAPPF barak tama servisu tarde, Sesta (31/05/2024). Foto/Tome da Silva

Iha fiskalizasaun urjente ne’e, ekipa fiskalizasaun “kaer ho liman no haree ho matan” katak funsionáriu MAFPP nian barak mak tama servisu tarde no balun tama tiha sai fali bá fasin seluk mas asina kedas ona listra prezensa dadeer nian tuku 08:00 Otl no asina mós lista sai servisu nian iha tuku 17:30 Otl

“Ami nia objetivu ne’e atu mai haree sira nia atividade loroloron nian, liuliu ba sira nia prezensa tanba tuir lei estatutu funsaun públiku númeru 8 altera ba lei númeru 5 hateten loron ida ita tama servisu oras ualu (8). Por ezemplu, ita tama tuku 8:00 dadeer sai iha 12:30  otl depois tama fali 13:30 sai 17:30 Otl. Realidade iha MAFPP, ami mai tuku 8:00  dadeer maibé funsionáriu lubuk ida mak seidauk mai depois ami konfirma ba finger print ho sira nia manual la hanesan dehan ema barak mak viajen ba munisípiu ka estranjeiru, maibé iha ne’ebá la iha lista manual, ne’e la iha justifikasaun ne’ebé klaru depois iha lista prezensa la hanesan ho finger print tanba balu asina tiha ona tuku 17:30 Otl,” Komisáriu CFP ba Asuntu Disiplinár, Agapito da Conceição hateten ba jornalista sira iha MAFPP, Comoro, Díli.

Hosi vizita ne’e atu halo prevensaun ida ba funsionáriu hotu hodi servisu tuir oras tanba mákina estadu ka programa IX Governu Konstitusionál atu la’o ba funsionariu hotu-hotu tenke kumpre ba oras servisu ne’ebé mak vigora.

“Ohin ami rekolla dadus lubuk ida, ba se-se mak mai tarde ne’e. Ba sansaun loron primeiru ne’e ami ko’a sira nia osan. Mas, kuandu liu loron hira ami sei rekolla absensia ba fulan kotuk se karik balu viola ami se fó sansaun represaun eskrita ka suspensaun ba sira,” Agapito da Conceição  hateten.

Tama tarde servisu, ekipa fiskalizasuan taka portaun, Sesta (31/05/2024). Foto/Tome da Silva

Ba ida-ne’e se prosesu nafatin funsionáriu sira nune’e iha inspesaun ne’e foka ba hotu-hotu la’ós iha absensia de’it tanba iha ne’e iha ekipa konjunta ida hosi haree mós ba uzu fasilidade ka patrimóniu Estadu nian.

Ekipa konjunta ohin to’o iha ne’e rekolla dadus lubuk ida tanba tuir dekretu Lei númeru 80/2022 ko’alia kona ba regulamentu jestaun veíkulu Estadu ninian tanba ne’e komesa hosi Diretór Jerál sira mai to’o iha kraik ne’e fó ona subsídiu ba sira inklui funsionáriu sira hotu-hotu ho ida ne’e katak la iha ona antar jemput.

Iha fatin hanesan Diretór jerál ba Prevensaun no Sensibilizasaun CAC,  Rosario Salsinha Araújo hateten hakarak atu kuda kultura di’ak iha Estadu ne’e funsionáriu públiku sira hotu-hotu tenke kumpre ba regulamentu sira ida ne’e lei mak hatete katak servisu loron ida iha durante oras ualu (8) nia laran nem kotu tanba ne’e labele aproveita ba momentu hirak hanesan ne’e atu feriadu, falta, asina lista prezensa ho finger print tuir sira nia hakarak loloos ne’e labele halo ida ne’e.

CAC konsidera funsionáriu tama kona-bá asuntu korrupsaun la’ós ko’alia kona-bá ema na’ok osan boot maibé liga ba asuntu sira ema falta servisu, asina lista prezensa hosi tuku 8:00 seidauk to’o lokraik nia asina ka prienxe hotu ona ida ne’e violasaun boot ne’ebé sasán hirak ne’e tama iha parte korruptu ida maibé tama iha nivel ida ki’ik nune’e CAC rasik se hato’o relatóriu ruma ba Komisaun Funsaun Públiku atu hola medida.

“Indísiu sira ne’e ami buka no ami hato’o notifikasaun ba funsaun públiku atu hola medida nune’e ba oin servisu ida-ne’e se kontinua  ita lakohi funsionáriu sira abandona hela hanesan ne’e, Ema barak terus hela iha li’ur maybe ida servisu ona mak hakarak manobra fali tempu servisu hanesan ne’e la di’ak ne’ebé buat hotu-hotu tenki justifika ida ne’e mak loos,” Rosario Salsinha Araújo hateten.

Iha fatin hanesan Diretór rekursu umanus MAPPF, Hipolito Costa agradese ba ekipa fiskalizaun husi CAC, CFP, IGJ ho Patrimóniu Estadu  bele mai hafanu funsionariu hotu iha MAFFP  hodi nune’e buat balun la’o ladún di’ak tenke hadi’a.

Nia hatutan hosi inspesaun ne’ebé iha funsionáriu balu asvezes sira dadeer asina ona listra prezensa no asina dala ida kedas ho parte loraik nian sei foti medida própriu tuir regra ne’ebé mak iha.

Funsionáriu MAPPF ka Peskizadór MAPPF Zoti Aquino  apresia tebes ba vizita supreja ne’ebé ekipa konjunta halo ne’e se bele tenke iha rekomendasaun ida uluk bainhira atu ba vizita.

“Hanesan funsionáriu tinan lubuk ida ona ha’u servisu iha Ministériu Agrikultura no Peska tanba ne’e  lala’ok sira atu saida mak akontese iha ne’e ita hatene hotu kedas no se bele atu di’ak liu buka hadi’a,” Zoti Aquino dehan.

Nia dehan se bele aban bairua komisáriu sira mai fali karik portaun le bele taka  tanba hanesan funsionáriu mai la’ós atu Servisu iha Ministériu ne’e de’it lae. ezemplu ida se diretór ida mak iha reuniaun ida ho Primeru-Ministru agora entaun nia atu sai ba tuir maibé odamatan taka tiha entaun nia labele ona halo reuniaun ida ne’e mak hanesan funsionáriu preokupa tebes ho situasaun hanesan ne’e.

Jornalista Estajiáriu :  Lazaro Pereira Quefi