Delegasaun Vatikanu Hahú Halo Inspesaun Fatin ba Vizita Papa Francisco iha Díli

Hatutan.com, (03 Juñu 2024), Díli–Delegasaun husi Vatikanu hamutuk Governu Timor-Leste, inklui Igreja Katólika, Segunda (03/06/2024),  hala’o enkontru ko’alia kona-bá preparasaun ba vizita Santu Padre Francisco, durante loron tolu iha Díli, hahú husi loron 09 to’o loron 11 fulan-Setembru, tinan ne’e.

Lee Mós: Konstrusaun Altar Misa ho Papa Francisco Atinje 80%, Sekretariadu Komisaun Altu Nível iha Motael

Delegasaun husi Vatikanu halo enkontru ho Igreja lokal Timor-Leste no ho Governu Timor-Leste iha Díli, Segunda (03/06/2024). Foto/Elio dos Santos da Costa

Arsebispu Arkidioseze Metropolitana Díli, Dom Virgílio Kardeál do Carmo da Silva , SDB hateten enkontru ofisial ne’e ko’alia kona-bá oinsá preparasaun ba vizita Santu Padre nian ne’ebé antes ne’e hala’o ona enkontru iha fulan-Janeiru 2024.

“Atu haree kona-bá buat hotu ne’ebé ko’alia ona iha enkontru fulan-Janeiru nian ne’e oinsá, la’o to’o iha ne’ebé, saida mak atu hadi’a. Enkontru  ne’e, atu  follow-up ba buat ne’ebé mak ko’alia ona, kona-bá programa no buat sira ne’e presiza hadi’a,” Dom Virgílio Kardeál do Carmo da Silva SDB,  informa bá jornalista sira.

Kardeál dahuluk Timoroan ne’e esplika enkontru ne’e hanesan Iitrodusaun breve no fó benvindu ba delegasaun Vatikanu nian, nune’e tuir mai husi parte tékniku sei halo inspesaun  ba parte  ne’ebé mak Santu Padre sei liu ba.

Kona-bá preparasaun jerál sidauk iha bele fó sai nia atinjimentu to’o ona porsentu hira tanba agora foin hamutuk atu haree nia iha nivel hira.  Maibé,  enkontru jerál ne’e haree liu iha nivel nasionál ne’e oinsá nia preparativus.

Iha biban ne’e reprezentante Santa Sé iha Timor-Leste Mgr. Marco Sprizzi hateten vizita delegasaun Vatikanu hamutuk   na’in-16 ne’e hanesan kompromisu  husi Vatikanu atu mai servisu hamutuk ho parte igreja  lokál Timorense no Governu Timor-Leste kona-bá preparasaun ba vizita Santu Padre Francisco bele garante kondisaun no situasaun ne’ebé seguru.

Iha Tersa (04/06/2024), sei halo inspesaun ba sala VIP Ospitál Nasional Guido Valadares (HNGV), Sala emerjénsia Dili Medical Center, inspesaun ba konventu Komunidade madre Alma iha praia dos Coqueiros, Centru Covençoes Dili, Tasi Tolu, reuniaun ekipa DOV ho  unidade servisu seguransa no defeza ho intelijénsia.

Iha loron  tuir mai, 05 fulan-Juñu, aprezentasaun relatóriu ekipa ba Primeiru-Ministru no ikus deskola ba aeroportu internasionál  prezidente Nicolau Lobato.

 Jornalista: Leopoldina de Carvalho