Ezekusaun OJE 2024 iha Trimestre Primeiru Foin 11,7%

Hatutan.com, (06 Juñu 2024), Díli—Relatóriu ezekusaun Orsamentu Jeral Estadu tinan fiskal 2024 iha primeiru trimestre ne’e  foin 11,7%.

Lee Mós: Prezidente Repúblika Promulga OJE 2024 Billaun $1,95

Kondisaun estrada aat tebes iha tempu udan, iha postu administrativu Turiscai, Munisípiu Manufahi. Foto/dok. Tomé da Silva.

Prezidente Komisaun C trata asuntu Finansas Públiku, Cedelizia Faria do Santos, Kinta (06/06/2024), hateten Komisaun C aprová relatóriu pareser  nian  bá ezekusaun primeiru trimestre bá OJE 2024 ne’ebé nia ezekusaun 11,7 %.

Orsamentu ne’ebé  aloká bá  Rejiaun Administrativu Espesiál Oe-Cusse Ambeno (RAEOA)  mós nia ezekusaun  mós foin 3%.

Orsamentu  ne’ebé aloká bá siguransa sosiál nia ezekusaun  ho persentajen ne’ebé mak baixa tebes.  “Ezekusaun di’ak liu mak  husi Ministériu Negósiu Estranjeiru no Kooperasaun (MNEK) nian,   tanba nia orsamentu barak mak halo transferénsia bá  konsuladu sira kaq embaixada sira  iha li’ur.  Entaun ninia transferénsia públiku ne’e mak  tuir Komisaun C sira nia  haree sa’e di’ak liu liña ministerial sira seluk,  MNEK ho  arkivu Nasionál inklui Ministériu  Veteranu nian, sira nain tolu ne’e mak  atinji top 10,” Deputada Cedelizia Faria do Santos hateten bá jornalista sira iha PN.

Iha  primeiru trimestre Governu foti ona no  husu fundu petrolifeiru  hamutuk millaun $300  sira halo ona transferénsia husi fundu petrolifeiru mai hodi submete  sustenta makina estadu.   Tanba ne’e, Komisaun C iha PN husu bá Governu atu  sira tenke tau atensaun  di’ak bá sira nia ezekusaun, tanba tau  orsamentu pur programa,   hasoru  programa barak ,  tau tiha osan la ezekuta ne’e ladún di’ak.

“Ami husu bá membru Governu sira  atu tau atensaun bá prosesu  ezekusaun hotu haree bá orsamentu ne’ebé mak aprová ona, ami husu mós sé karik bele sira halo sira  kalendariu ida  para bele atu kontrola iha periodu primeiru saida mak sira halo segundu saida mak sira halo  bá oin bele fasilita sira  halo sira nia ezekusaun ho di’ak,” Nia Subliña.

OJE 2024 ho montante  billaun 1,95 aprova final global iha Parlamentu Nasionál (PN) iha loeon 20 fulan-Dezembru 2023 ho nia rezultadu aprovasaun ho votu a-favór 41, kontra 23 no abstensaun laiha.

Proposta-Lei OJE 2024 ne’ebé Governu aprezenta ho montante biliaun $1,95 bá Administrasaun Sentrál, Rejiaun Administrativa Espesiál Oé-cusse Ambeno (RAEOA) no Seguransa Sosiál sein Fundu Rezerva Seguransa Sosiál.

Osan billaun $1,95  ne’e fahe bá kategoria saláriu no vensimentu, bens no servisu millaun $386,3, transferénsia públika millaun $589,7, kapitál menór millaun $34,2 no kapitál dezenvolvimentu millaun $411.

Orsamentu Seguransa Sosiál inklui Fundu Rezerva Seguransa Sosiál hetan alokasaun millaun $347,6. Prevee mós bá asuntu ekonómiku millaun $788,2, protesaun sosiál millaun $467,1, edukasaun millaun $140,9, saúde millaun $66,2 no abitasaun no infraestrutura koletiva millaun $45,2.

Jornalista Estajiária : Zita Menezes