Ekipa Konjunta Taka Sticker iha Transporte Públiku Kona-bá Direitu Ema ho Defisiénsia

Hatutan.com, ( 07 Juñu 2024), Díli—Ekipa konjunta ne’ebé lidera husi Ministeriu Transporte no Komunikasaun  ( MTK),  Diresaun Nasionál Transporte no  Terrestre ( DNTT),  Polísia Nasionál Timor-Leste Seksaun Tranzitu ( Poltrans), Asosiasaun Defisiensia Timor-Leste (ADTL) no Juventude ba Dezenvolvimentu Nasional, Sesta (07/06/2024), halo lansamentu hodi taka  sticker ba transporte públiku kona-bá direitu ema ho defisiensia.

Lee Mós: AHDM-TL Kondena Aktu Brutalizmu Membru SNI Hasoru Ema ho Defisiénsia

Ministru Miguel Marques Gonçalves Manitelu hatudu hela sticker kona-ba direitu ema ho difisiensia. Foto/Tome da Silva

Ministru Transporte no Komunikasaun,  Miguel Marques Gonçalves Manitelu ne’ebé lidera atividade ne’e esplika atividade taka sticker  iha estasaun transpoerte públiku nian iha aredór Sentru Konvensaun Díli (CCD, sigla portugés) atu fo hanoin bá pasajeiru ka motorista sira nune’e bele  fasilita maluk defisiensia sira bainhira utiliza transporte públiku.

“Presiza iha konsiensia hodi fó espasu bá sira nune’e sira bele tur iha mikrolete laran ho dignu, Labele haluha ita sira ne’e mós loron ida bele sai defisienti, liu husi moras sira ne’ebe kona ita ne’e, ne’ebé husu ba Timoroan atu bele respeita, tanba agora ita forte, maibé loron ida mós bele, maluk sira ne’e balun moris mai ho kedan kondisaun defisiensia, balun dezastre,” Ministru Miguel Marques Manitelu hafoin halo lansamentu ba atividade taka sticker bá mikrolete sira.

Nia haktuir tanba ne’e ema hotu presiza iha konsiensia katak ema hotu bele sai defisiensia, loron ruma bele la’o ho ai-tongka, tur kursi roda, tanba ne’e presiza tulun malu liu-liu hanesan Timor oan trata ema ho defisiensia ho dignu.

“Husu bá komunidade hotu atu halo tuir saida mak hatudu iha sticker ne’e labele lee tiha depois husik deit ka les tiha,” Nia hateten.

Iha biban ne’e Komandante Polísia Trazitu Nasionál, Luis da Costa hateten Polisia Nasional Timor-Leste ( PNTL) liu-liu diresaun Tranzitu prontu apoiu nafatin hodi tulun maluk defisiensia sira sei taka iha transporte públiku sira hanesan mikrolet atu nune’e fó hanoin bá iha motorista sira atu respeita ita nia maluk sira ne’e defisiensia

“Dala ruma ema ho defisiensia mós utiliza transporte públiku hodi halao atividade, Nune’e, espera katak motorista sira ne’e mós sei tau atensaun nune’e ema hotu bele respeita maluk defisiensia,” Luis da Costa tenik.

Ministru Miguel Marques Gonçalves Manitelu taka hela sticker iha mikrolete ida kona-ba direitu ema ho difisiensia. Foto/Tome da Silva

Prezidente Juventude Dezenvolvimentu Nasionál, Beliza Maria Mesquita Dias, hateten hafoin liu husi  diskusaun iha loron hira  hamutuk ho foin-sae sira, liu-liu feto ho defisiensia hodi rona husi sira, saida mak sira nia ejinensia nune’e hodi bele buka solusaun.

“Kona-bá saida mak sira atu muda, saida mak tenke rona husi sira, nune’e liu husi diskusaun ami identifika katak saida mak persija halo mudansa lalais mak persija iha transporte ne’ebe seguru, pasajeiro ho motorista sira persija respeita no fo fatin espesial ba maluk defisiensia sira,” Beliza Maria Mesquita Dias  hateten.

Nia esplika, katak seguru mak hanesan ema ho defisiensia tenke tur iha kadeira ne’ebe hanesan iha kondutor nia kotuk, tur iha kadeira nebe besik odamatan no iha mikrolet nia oin, nune’e bele ajuda sira sae no tun lalais.

Liu husi lansamentu ne’e asosiasaun defisiensia Timor-Leste mós sujere ona  ba MTK atu kria Dekretu-Lei ka kodigu konduta ida,  nune’e bele fo responsabilidade ba kondutor ida kona-bá oinsa  asegura seguransa iha kareta públiku ida, nune’e ema ho defisiensia bele sente seguru no konfortavel liu bainhira asesu transporte públiku.

Jornalista : Leopoldina de Carvalho