Estrada iha Viqueque Presiza Atensaun

Hatutan.com, (11 Juñu 2024), Díli—Parlamentu Nasionál (PN) liuhosi Deputadu Bankada FRETILIN Antoninho Doutel Sarmento husu bá Governu, presiza tau atensaun bá estrada sira iha munisipiu Viqueque tomak tanba kuaze ho kondisaun grave.

Kondisaun estrada iha área aldeia Caitau, suku Afaloicai, postu administrativu Uatulari. Foto Facebook Deonizio Magalhães.

Deputadu ne’e husu bazeia ba relatóriu fiskalizasaun iha fim de semana no identifika komunidade iha munisipiu ne’e maioria seidauk asesu bá estrada.

Lee Mós: Estrada iha Afaloicai-Uatulari Grave

Kada semana deputadu ne’e sempre sai bá halo fiskalizasaun la’o individu iha munisipiu, no nia tama  hosi Venilale liu hosi Ossu tuun bá to’o iha Igreja Viqueque nian haree estrada kontinua iha problema sériu.

“Kompañia balun book iha área Viqueque vila parte kuartél PNTL nian atu tama bá Viqueque vila laran hanesan laloran ida iha laran kedan tesik tán bá Uatu-lari to’o Uatu-Carbau estrada nafatin iha problema,” Antoninho Doutel Sarmento hateten iha intervenzaun plenária, segunda (10/06/2024).

Deputadu ne’e dehan, hahú kedan 2007 Timor Leste uza osan mina nian mai to’o ohin loron aumenta tán ho osan deve iha Banku Mundiál no ADB, maibé tanba saida mak dezenvolvimentu seidauk iha ekilibriu iha munisípiu sira liuliu iha Viqueque.

Tanba ne’e maka nia husu bá Governu atu haree dezenvolvimentu infraestrutura ne’e ho sériu no ho responsabilidade liuliu bá munsipiu Viqueque tanba tuir nia haree katak, OJE kada tinan investe boot bá dezenvolvimentu.

Kona-bá ne’e, Vise-Ministru Asuntu Parlamentár, Adérito Hugo da Costa hateten, sei envia assuntu sira ne’e bá Ministériu relevante sira hodi buka solusaun.

Jornalista Estajiária: Dircia Ximenes Guterres