Relatóriu: Pesoál PCIC husu Osan bá Oan-Mane Arnolfo Teves Jr Komete Abuzu Podér, Estorsaun no Korrupsaun

Hatutan.com, (12 Juñu 2024), Díli—Polísia Sientífika no Investigasaun Kriminál (PCIC, sigla portugés)  iha loron 08 fulan-Abríl 2024, finaliza ona sira-nia relatóriu kona-bá kazu pesoál PCIC ho inisiál OdCA husu osan bá oan-mane  fujitivu Arnolvo Teves Jr.

Lee Mós: Deskonfia, Pesoál Membru PCIC Husu Osan bá Oan-mane Fujitivu Teves Jr

Logotipu PCIC

Tuir dokumentu relatóriu PCIC nian ne’ebé Hatutan.com  asesu hateten katak pesoál PCIC ne’ebé asume mós kargu importante iha PCIC nia aktu husu osan ne’e   komete abuzu podér, estorsaun (pemerasan) no korrupsaun.

Informasaun husi relatóriu PCIC nian ne’e katak pesoál PCIC ho inisiál OdCA  kontaktu via WhatsApp ho númeru +670 77531xxx bá oan-mane Arnolfo A. Teves Jr iha Díli kona-bá nia aman nia kondisaun iha prizaun Becora (konversasaun iha lian ingles).

Pesoál PCIC ho inisiál OdCA ne’e lia-tun bá Teves Jr nia oan-oan mane katak, “foin daudaun ha’u vizita ó nia aman iha prizaun ho objetivu atu haree ó nia aman nia kondisaun seguransa.”  Nune’e, Teves Jr nia oan-mane  husu tenik, “buat hotu oinsá?”.

Pesoál PCIC ne’e hatán hodi dehan, nia aman nia seguransa garantidu ou aseguradu.” Rona tiha lia-hirak ne’e, Teves Jr nia oan-mane lia-tun tenik hodi husu kona-bá saida mak nia bele halo hodi ajuda nia aman nia situasaun.

Pesoál PCIC ne’e haktuir ho lian-ingles katak “fó ha’u osan ruma nune’e ha’u bele hola buat ruma bá Guarda Perizonial sira.” ho nune’e Teves Jr nia oan-mane husu tenik, “saida mak sira (Guarda Perizonial-red) presiza?” ho nune’e pesoál PCIC ne’e hatán, “depende ba ita-boot!”  mas Teves Jr haktuir dehan depende ba sira-nia nesesidade. Ho nune’e,  pesoal PCIC ne’e responde, “$2,000 se posivel.”

Rona tiha lia-hirak ne’e, fujitivu Arnolfo Teves Jr nia-oan mane ho nasionalidade Filipina ne’e  hatán dehan nia sei koko hodi hetan osan ne’ebé pesoál PCIC husu.

Iha relatóriu PCIC nian ne’e mós mensiona konversasaun ne’e iha mós gravasaun voice entre pesoál PCIC ho oan-mane Arnolfo Teves Jr.

Relatóriu PCIC nian ne’e mós sita ka haktuir observasaun sira PCIC nian kona-ba Arnofo A. Teves Jr tama Timor-Leste to’o ekipa konjunta INTERPOL ho PCIC (hanesan mós INTERPOL Timor-Leste) kaptura fujitivu Arnolfo A.Teves Jr iha loron 21 fulan-Marsu 2024 no detein iha sela PCIC nian.

Iha loron 23 fulan-Marsu 2024 tuir desizaun Tribunál Supremu Justisa Timor-Leste nian transporta fujitivu Arnolfo Teves Jr bá kumpre Prizaun Preventiva iha Estabelesimentu Prizionál Becora-Díli.

Konsellu Antiterrorismu Filipina fó sai no klasifika Arnolfo A. Teves, Jr. nu’udár líder bá grupu armadu ilegal no grupu terrorismu iha Filipina.  

Lee Mós: MJ Sérgio Hornai Sei Foti Medida Hasoru Pesoál PCIC Husu Osan bá Oan-Mane Fujitivu Teves Jr

Ministru Justisa Sergio Hornai Seidauk Simu Relatóriu

Ministru Justisa, Sérgio de Jesus Fernandes da Costa Hornai. Foto/Elio dos Santos da Costa

Ministru Justisa (MJ) Sergio Hornai  ne’ebé Hatutan.com konfirma kona-bá relatóriu PCIC nian bá kestaun pesoál PCIC nian husu osan bá oan-mane fujitivu Teves Jr haktuir, nia parte seidauk simu relatóriu investigasaun finál nian hosi superior PCIC.

“Relatóriu la’o dadauk hela, ha’u seidauk simu akuzasaun ka  relatóriu finál. Maibé, informasaun, ha’u hanesan ministru, ita-boot sira hatene muitu-beim, diretór PCIC hanesan tutela diretamente bá iha ministru, sira update bá ha’u kona-bá progresu, no ita-boot sira hatene, sidadaun ne’ebé mak sujeita bá iha prosesu iha hela faze investigasaun,” Ministru Justisa, Sergio Hornai, hateten iha Palásiu Governu, Kuarta (12/06/2024).

Ministru Sergio pozisaun rasik kona-bá kazu husu osan ne’e, provizóriu nia seidauk bele halo konkluzaun ruma, husik investigasaun ka averiguasaun sira ne’e la’o, depois sira halo submisaun relatóriu investigasaun bá nia mak halo bele hola desizaun.

Molok ne’e, iha  Tersa 09 fulan-Abríl 2024, portavós PCIC, Mário Tavares informa kadas liuhosi konferénsia imprénsa katak, superior sira PCIC nian hola ona medida suspensun hasoru membru ne’e, hahú kedas ona ho prosesu averiguasaun hasoru sira-nia membru  pesoál PCIC ne’e durante loron sanulu, hodi rekolla provas ka indísiu hothotu. Maske nune’e,  informasaun ne’ebé iha katak, pesoal PCIC ne’e maske la tama servisu maibé nia kontinua fó orientasaun no  kontinua simu ninia saláriu mensal.

Hatán bá ne’e, Ministru Justisa  Sergio Hornai dehan de’it katak, hahú kedas hosi bainhira sujeita nia bá averiguasaun, iha tempu ne’ebá mós suspende kedas ona nia hosi servisu, nune’e bele konsentra de’it prosesu legál sira.

“Bom, apartir ida nia sujeita ona bá iha ne’ebá, komesa hosi ne’ebá, nia tenke suspende ona,” Ministru Sergio Hornai tenik.

Lee Mós: Pesoál PCIC husu Osan bá Oan Mane Fujitivu Teves Jr, Ramos-Horta Ezije Rezultadu Investigasaun

Jornalista: Rogério Pereira Cárceres