Jornalista: Felix Fernandes

Hatutan.com, (01  outubru 2026), Díli–Ministériu Públiku (MP) kontinua halo  inkéritu ba ema na’in-rua ne’ebé utiliza naran Prezidente Repúblika nian iha dokumentu hodi autoriza aviaun  Jet Privadu 700 Longitude (C700) aterra iha Aeroportu Internasionál Prezidente Nicolau Lobato, Díli, iha 01 Jullu 2026.

Molok ne’e, Ministériu Públiku rona ona ema  na’in-14, hodi nune’e, konstitui arguidu na’in-haat bá polémika jet  privadu.

Iha prosesu sira-ne’e, Ministériu Públiku imputa krime tolu bá arguidu na’in-haat, hanesan krime falsifikasaun dokumentu, notasaun téknika no burla agravadu, ne’ebé previstu no punidu iha artigu-267 no artigu 303 kódigu penál Timor-Leste, tanba  utiliza naran Prezidente Repúblika nian iha dokumentu hodi autoriza aterra  jet privadu husi Indonézia ne’e aterra iha Aeroportu Internasionál Prezidente Nicolau Lobato.

Aviaun jet privadu ho tipu Cessna Citation 700 Longitude (C700) rejistrasaun Indonézia sai polémika no hamosu dúvida tanba ministériu kompetente sira, hanesan Ministériu Negósiu Estranjeiru no Kooperasaun (MNEK) submete pedidu aterrazen ba Ministériu Transporte no Komunikasaun (MTK) ho rajaun katak transporta bainaka Prezidente Repúblika nian, maibé Prezidente Repúblika rasik deklara ona dehan nia laiha koñesimentu ba bainaka sira ne’e inklui jet privadu ne’e rasik.

Fonte Hatutan.com nian Ministériu Públiku  ne’ebé husu atu labele públika nia identidade, Kuarta (30/09/2026),  informa katak, Ministériu públiku  liu husi Prokuradór titulár sei  notifika tan na’in-rua ne’ebé servisu iha instituisaun relevante hodi presta deklarasaun iha prosesu inkéritu.

Fonte MP ne’e subliña katak, polémika kazu  jet privadu ne’e, posibilidade   manteín arguidu na’inphaat ne’ebé antes presta ona deklarasaun iha prosesu inkéritu, ho  sasin na’in-10, nune’e sei rona tan sasin na’in- rua.

Fó hanoin fali katak, polémika aterrasaun jet privadu ne’e, parte kompetente sira, hanesan Servisu Nasionál Intelijensia (SNI) ho Ministériu Públiku bolu ona pesoál na’in-14, husi Palásiu Prezidensiál, Ministériu Negósiu Estranjéiru no Kooperasaun (MNEK), no Ministériu Transporte no Komunikasaun (MTK), Autoridade Aviasaun Timor-Leste (AACTL), empreza CEVA Logistics no mós Servisu Migrasaun (SM).

Jet privadu ne’e tuir informasaun katak sai husi Aeroportu Halim Perdana Kusuma-Jakarta mai Díli, Timor-Leste no aterra iha Aeroportu INPL hale’u 17:15 Otl, 01 fulan-Jullu 2026. (*)