CNRT ho KHUNTO husu Kandidatu Komisáriu CAC Rui Pereira Hala’o Kna’ar ho Imparsialidade

Hatutan.com, (13 Juñu 2024), Díli– Bankada Parlamentár CNRT ho KHUNTO husu kandidatu foun komisáriu Komisaun Anti-Korrupsaun  (CAC,sigla portugés), Rui Pereira dos Santos atu hata’o kna’ar ho imparsialidade.

Lee Mós: Governu Submete Ona Lista Rui Pereira bá Kandidatu Komisáriu CAC

Kandidatu úniku Komisáriu CAC, Rui Pereira. Foto/Tome da Silva

Rui dos Santos Pereira hanesan mós jurista Timoroan ne’ebé kontribui makaas bá prosesu judisiáriu Timor-Leste  nian no  sai hanesan mós adjuntu  Provedória Diretu Umanu no Justisa (PDHJ) no mós sai adjuntu iha Comissão Anti-Corrupção (CAC).

“Ha’u la kestiona no fiar katak nia komprende no intende di’ak kona-bá lala’ok funsionamentu instituisaun CAC, kona-bá nia kapasidade, nia meritu no hanesan jurista iha Tribunál Distritál Díli ne’ebé nia komprende prosesu oinsá atende kazu korrupsaun sira,” membru PN husi Bankada CNRT, Natalino dos Santos hateten hodi responde Hatutan.com iha PN,  Kinta (13/06/2024).

Deputadu Bankada CNRT ne’e haktuir kandidatu Rui Pereira hetan fiar ona husi Governu no fiar katak iha tempu badak Parlamentu Nasionál  bele realiza ona eleisaun hodi hili nia nune’e bele eleitu  bá komisáriu  CAC para bele ezerse nian funsaun no instituisaun CAC  bele funsiona para bele atende kazu barak ne’ebé mak pendenti hela.

Bankada CNRT rekomenda bá kandidatu foun komisáriu CAC Rui Pereira dos Santos karik hetan fiar husi Parlamentu Nasionál mak tenke transparánsia, korajen no  brani foti desizaun.

“Labele partidariza instituisaun CAC. Instituisaun CAC ne’e bele fó esperansa bá ema hotu atu bele garante boa-Governasaun no kombate korrupsaun, atu nune’e, Estadu ida-ne’e bá oin dezemvolvimentu la’o ho di’ak tanba ema hotu-hotu iha transparánsia,” Natalino dos Santos hateten.

Deputadu Bankada KHUNTO, Luis Roberto haktuir Bankada KHUNTO nia posizaun importante mak funsionamentu bá instituisaun CAC ne’ebé estadu estabelese, karik rekursu Timoroan Rui Pereira dos Santos ne’ebé mak nia kandidatu bá komisáriu CAC ne’e Bankada KHUNTO fó apoiu.

“Ne’ebé karik liu importante mak atu ezekuta bazeia bá Lei no Konstitusionál no servisu ho profisionál hodi bele serbí bá ita nian nasaun iha área prevensaun no kombate korrupsaun,” Deputadu Luis Roberto hateten.

Parlamentu Nasionál (PN) liuhosi enkontru Lider Bankada, husu Governu atu submete lalais lista kandidatu komisáriu CAC bá Parlamentu Nasionál, atu nune’e, bele tau iha ajenda para hakaat bá eleisaun.

Sekretáriu Estadu Komunikasaun Sosiál (SEKOMS), Expedito Dias Ximenes ne’ebé reprezentante Vise-Ministru asuntu Parlamentár haktuir lidér Bankada   mós hato’o kona-bá nomesaun  Rui Perreira atu kandidatu bá komisáriu CAC, nune’e Parlamentu Nasionál husu sé bele lalais haruka Governu oinsá bele  haruka lista kandidatu komisáriu CAC nian mai PN atu ajenda bá eleisaun.

Sekretária meza parlamentár, Virgínia Ana Belo haktuir  Bankada sira mak deside para depois Prezidente PN akamiña pedidu ne’e ba iha Primeiru Ministru, Sekretariu Estadu fó informasaun  katak Konsellu Ministru, Kuarta (12/06/2024), aprova ona Rui Perreira nu’udár kandidatu komisáriu CAC  maibe karta seidauk to’o iha Parlamentu Nasionál.

“Ami seidauk tau iha ajenda atu hatama ba eleisaum. Espera katak semana oin kq dentru  loron hira ne’e, bele haruka mai PN hodi lori bá eleisaun,” Deputada Virgínia Ana Belo esplika.

Lee Mós: Rui Pereira Sei Garante Imparsialidade CAC iha Hala’o Knaar Sira

Jornalista Estajiária: Zita Menezes/ Dircia Ximenes Guterres