Domingas Afonso Amaral Lidera FOKUPERS Períodu 2024-2027

Hatutan.com, (14 Juñu 2024), Díli– Domingas  Alfonso Amaral, lidera Forum Komunikasaun bá Feto Timor-Leste (FOKUPERS) períodu 2024-2027 ho programa prioridade tolu.

Lee Mós: FOKUPERS Atribui Sertidaun Moris bá Labarik Vítima Na’in-36

Domingas Alfonso Amaral, lidera FOKUPERS períodu 2024-2027. Foto/Tome da Silva

Domingas  Alfonso Amaral hetan konfiansa hosi fundadór FOKUPERS nian ne’ebé mak inisia organizasaun ida ne’e to’o agora no momentu ne’e  nia kontente tebes bele hola parte  hodi lori FOKUPERS  nia naran ba oin ho di’ak liu tan.

“Ha’u simu ona dokumentu mahar boot ida klaru katak iha tinan-lima (5) ba oin ha’u presiza kaer hanesan baze legal ida atu hala’o ha’u nia servisu. Tanba ne’e FOKUPERS nafatin kontinua liu hosi asisténsia integradu ba feto no labarik feto sira no kontinua halo advokasia,” Diretora foun FOKUPERS, Domingas  Alfonso Amaral hateten, Sesta (14/6/2024).

Nia haktuir FOKUPERS la’ós atu fó servisu de’it ba asisténsia, akompañamentu no empoderamentu ba feto sobrevivente maibé kontinua halo advokasia tanba sobrevivente mak FOKUPERS ninia alvu.

Advokasia ne’ebé FOKUPERS  halo atu oinsá mak atu dere de’it ba ukun na’in sira nia laran atu aprosima sira hodi oinsá mak bele iha alokasaun orsamentu ne’ebé sensivel ba feto no labarik sira nia nesesidade.

Iha fatin hanesan Diretora FOKUPERS sesante, Maria Fatima Pereira Guterres hateten servisu ne’e iha hahú no iha mós remata tanba ne’e ba servisu sira hotu-hotu ne’ebé mak iha importante liu mak tenke hamutuk atu bele bele alkansa hodi hetan susesu Ida.

“Ha’u nia susesu Primeiru Bainhira hahú ha’u nia mandatu iha FOKUPERS  mak rezolve kazu Topohonis Oé-cusse tanba ne’e durante tinan-tolu (3) buat barak konsege ultrapasa maske iha problema liuliu ba sobrevivente sira nian violénsia bazeia ba jéneru,” Maria Fatima Pereira Guterres hateten.

Buat boot ne’ebe mak konsege halo no lori FOKUPERS tama iha rede ASIA ne’ebé haree ba iha uma mahon ninian depois mós buat seluk tan mak servisu sira durante ne’e koopera nafatin ho Ministériu Saúde, Edukasaun, Sosiál no  sira seluk tan rezolve kestaun lubuk liga ba violasaun sira.

Kestaun seluk mak konsege kria kooperasaun di’ak ho Ministériu Justisa atu bele fó sertidaun moris ka RDTL ba iha vítima nia oan sira ne’ebe moris iha uma mahon.

Jornalista Estajiáriu :  Lazaro Pereira Quefi