DNTT Distribui Karta Deklarasaun bá Taksista Sira Atu iha 2025 Labele Ona Hala’o Operasaun iha Díli

Hatutan.com, (19 Juñu 2024), Díli- Diresaun Nasionál Transporte  no Terrestre (DNTT) distribui ona karta deklarasaun bá  taksista sira  hodi prienxe no deklara atu iha tinan oin 2025 labele  ona halo operasaun iha Díli laran tanba kondisaun karreta taxi sira-ne’e maioria  tuan ona.

Taksista sira bá husu ajuda bá Bankada FRETILIN atu haree kona-bá karta deklarasaun ne’ebé DNTT fó bá sira hodi termina taxi sira-nia operasaun iha Díli iha tinan 2025. Foto/Zita Menezes

Iha karta deklarasaun ne’ebé maioria taksista sira la komprende nia sentidu loloos ne’e hateten katak formuláriu ne’e fahe bá sira atu voluntáriamente prienxe no asina hodi dehan sira simu desizaun husi DNTT ne’ebé fó tempu bá nia karreta  hanesan taxi bele hetan nia lisensa trajetu ho nia prazu tinan-ida (1) no sei la renova fali, nune’e bele muda bá privadu.

Ho karta ne’ebé distribui atu taksista sira hotu iha kapitál Díli prienxe  ne’e halo sira la komprende nune’e, Kuarta (19/06/2024), taksista sira organiza malu hodi bá  hasoru membru Parlamentu Nasionál husi Bankada FRETILIN atu bele ajuda sira.

“Ami taksista mai hato’o ami nia preokupasaun bá Parlamentu Nasionál liuhosi Bankada FRETILIN tanba Governu liuhusi DNTT atu hapara ami nia operasaun taxi hodi haruka ami prienxe karta deklarasaun husi DNTT atu ami nia operasaun ne’e válidu tan bá tinan ida de’it ona. Tanba ne’e mak ami mai hasoru Bankada oposizaun FRETILIN para bele ajuda ami nia problema ne’e ka lae,” portavós  taksista José Maria informa  bá jornalista sira iha PN.

Tuir nia katak formulariu ida-ne’e nia rasik seidauk asina no parte DNTT dehan sira  tenke asina para tinan oin taxi tenke hapara no DNTT sei foti  xapa matrikula  taxi no fó fali xapa matrikula privadu.

“Ho ida-ne’e mak ha’u lamenta.  Karik DNTT hapara ami nia taxi  nia operasaun oinsá mak ami bele buka osan hodi sistema ami nia moris no ami nia família nia presiza. Sé karik hapara ida-ne’e Governu fó fali servisu ida mai ami para bele sustenta família no oan sira nia eskola no moris loro-loron, ne’e bele,” José Maria hateten.

Karta deklarasaun ne’ebé DNTT fó bá taksista sira atu prienxe. Foto/Repro

Taksista sira konsidera karta deklarasaun ne’ebé DNTT fó ne’e obrigatoriu tanba laiha koñesimentu husi parte relevante sira no la iha asinatura ho laiha karimbu.

Iha fatin hanesan  Vise-Xefe Bankada FRETILIN, Deputada Maria Angelica Rangel hateten taksista sira mai hasoru Bankada FRETILIN atu fó informasaun katák agora daudaun IX Governu hakarak hapara transporte públiku nia operasaun, liuliu taxi.

Nia haktuir taksista sira preokupa tanba ida-ne’e mak sira nia moris loro-loron nian, oinsá mak Governu bele hapara atu sira bele buka sira nia moris no sira atu hetan osan husi ne’ebé.

Deputada Maria Angelica Rangel hateten, Governu labele hapara arbiru de’it ajénte  ekonómia sira, liuliu maluk taksista sira ne’ebé mak ohin mai hato’o keixá iha Bankada FRETILIN. Nune’e  husu karik Governu atu hapara tenke bazeia bá lei sistema bazé transporte  radoviaria nian.

“Ita-nia nasaun adopta merkadu livre entaun sidadaun ida iha direitu atu halo sirkulasaun ekonómia iha nia paíz rasik importante priénxe rekejitu ne’ebé iha,” Nia hateten.

Bankada FRETILIN sei halo análize  no  sei rona husi parte hotu-hotu no sei husu Governu solusaun saida mak sei fó bá asuntu ida-ne’e.

Jornalista Estajiária: Zita Menezes