OPS Tenke Rejísta Komunidade Ne’ebé Partisipa Misa Vizita Papa Francisco iha Tasi-tolu

Hatutan.com, (20 Juñu 2024), Díli-Komandante Jerál Polisia Nasional Timor-Leste (PNTL), Komisáriu Polisia Henrique da Costa, fó ona orientasaun bá membru Ofisial Polísia Suku (OPS) hamutuk na’in-452 iha territóriu nasionál atu rejista hotu identidade hosi komunidade ka sarani sira ne’ebé hakarak atu partisipa misa vizita papa Francisco nian iha Tasi-tolu, Díli.

Lee Mós: F-FDTL ho PNTL Armoniza Regra Operasaun no Seguransa bá Vizita Papa Francisco

Orientasaun ida ne’e komandu PNTL hasai nu’udár faze preparasaun ida bá planu no seguransa nian hodi simu vizita Papa Francisco nian mai Timor-Leste ne’ebé tuir oráriu iha loron 09 to’o loron 11 fulan-Setembru 2024.

Komandu Jerál PNTL halo enkotnru ho OPS sira hodi fó orientasuna servisu seguransa nian bá vizita Papa Francisco iha Timor-Leste. Foto/Elio dos Santos da Costa

Komandu Jerál PNTL, Kinta (20/06/2024),  konvoka reauniaun jerál ida ho membru OPS sira hosi munisípiu 12 no Rejiaun Administrativa Espesial Oecusse Ambeno (RAEOA) ne’ebé tema; “Preparasaun Seguransa bá Vizita Sua Santidade Papa Francisco mai Timor-Leste” atu halo aprezentasaun ida kona-bá sira-nia preparasaun bá simu vizita Sua Santidade Papa Francisco nian.

“Komandu fó mós orientasaun ruma bá membru sira, atu nune’e bele servisu hamutuk ho xefe suku sira, katekísta sira, hodi alista sarani sira kada  suku ne’ebé maka sei entrega fila-fali ba iha administrasaun postu depois ho parókia sira ne’ebé maka atu mai partisipa misa iha Díli,” Komisáriu Henrique da Costa informa bá jornalista sira.

Komandu alerta mós membru sira ne’e atu bele haree poténsia ameasa sira ne’ebé maka dala-ruma bele akontese, hahú kedas husi sira ida-idak nia suku, tanba OPS sira mak servisu besik liu ba komunidade.

Komisáriu Henrique enkoraza membru OPS sira atu nafatin mantein komunikasaun di’ak ho líder komunitáriu sira iha kada suku hanesan xefe aldeia no xefe suku sira, Juventude, Igreja, Veteranu sira, NGO sira ne’ebé mak besik iha komunidade, nune’e uainhira akontese buat ruma, PNTL liuhosi OPS sira bele atua ho laís.

Membru OPS Enfrenta Difikuldade

Líder másimu iha instituisaun PNTL  ne’e mós rekoñese katak, durante ne’e membru OPS sira enfrenta difikuldade iha servisu loro-loron. Tanba ne’e, komandu sei buka esforsu atu responde bá dezafiu sira. Maibé, komandante jerál ne’e fó hanoin bá nia membru sira atu nafatin mantein komunikasaun di’ak ho komunidade sira, tanba sé sira laiha komunikasaun di’ak ho komunidade, komandu bele fornese ekipamentu oioin mós sira sei la susesu.

Oras ne’e dadauk forsa PNTL ho F-FDTL halo esforsu namanas atu estabelese Sentru Komandu Kontrolu nian iha Kuartel-Jerál Caicoli, hodi koordena servisu seguransa no operasaun ninian durante vizita Papa Francisco nian iha TL.

 Jornalista: Rogério Pereira Cárceres