Nasionál
Kargu Xefia Sira iha Instituisaun Governu Labele Bandu Jornalista Halo Kobertura iha Espasu Públiku
Hatutan.com, (11 Jullu 2024), Díli–Vise-Ministru Asuntu Parlamentár, Adérito Hugo da Costa, husu bá kargu xefia sira iha instituisaun Governu atu labele bandu jornalista ka mídia sira bainhira hakaat bá sira nian fatin hodi halo kobertura liga ho servisu ministériu sira nian.
Lee Mós: Index Liberdade Imprensa, TL Hosi TOP 10 Tun bá 20
Ambiente enkontru Vise-Ministru Asuntu Parlamentár, Adérito Hugo da Costa ho kargu xefia sira iha instituisaun Governu, Kinta (11/07/2024). Foto/Tome da Silva
“Labele bandu jornalista sira atu halo kobertura iha espasu públiku tanba estadu garante liberdade imprensa, sé mak fó informasaun falsu ne’e viola direitu públiku nian atu hatene informasaun loloos,” Vise-Ministru Asuntu Parlamentar Adérito Hugo da Costa bainhira halo enkontru ho kargu xefia kada liña Ministériu sira iha Sentru Kulturál Indonézia nian iha Díli, Kinta (11/07/2024).
Tuir nia katák Ministériu Saúde famouzu loos iha fulan hirak liubá katák Hospitál Nasionál Guido Valadares (HNGV) dehan bandu jornalista sira labele halo kobertura iha espasu ne’ebá.
“Sé jornalista badinas bá besik imi nian fatin, favór ida-ne’e oportunidade ida gratuita no tuir loloos imi agradese bá sira no tenke iha espasu atu ko’alia ho mídia sira kona-bá servisu saida mak ita-boot sira halo no informasaun saida mak públiku presiza atu hatene,” antigu jornalista ne’e hateten.
Sekretáriu Estadu Komunikasaun Sosiál (SEKOMS) iha papél importante tebes no husu Kargu xefia sira bele fasilita dadus bá média sira atu nune’e sira bele divulga informasaun ne’ebé loos no kredivél.
Biban ne’e Sekretáriu Estadu Komunikasaun Sosiál (SEKOMS), Expedito “Loro” Dias Ximenes, husu públiku labele fiar direita informasaun espalla iha rede sosiál no live streming sira.
“Tenke konfirma mós ho mídia konvensionál sira hanesan ne’ebé hetan sertifikasaun husi Konsellu Imprensa hodi garante informasaun konfiavél no tanba bainhira média sosiál ne’ebé la rejistu sira mak hamosu hoax ka disinformasaun,” eis aprezentadora Grande Entrevista GMNTV ne’e subliña.
Iha Lei Komunikasaun Sosiál Artigu 41.º ko’alia kona-bá Atentadu bá Liberdade Informasaun;
- Sei hetan pena-prizaun to’o tinan-rua ka multa ba ida-ne’ebé maka:
a). Impede ka perturba kompozisaun, impresaun, distribuisaun no sirkulasaun livre hodi halo publikasaun;
b). Tahan publikasaun sasá de’it;
c). Tahan ka hahaat materiál sasá de’it ne’ebé presiza hodi hala’o atividade jornalístika.
d). Impede asesu livre jornalista nian iha fatin públiku ka ekipa órgaun imprensa nian;
e). Halo aktu seluk sasá de’it ne’ebé perturba, impede hamosu ka hamenus kapasidade hodi hala’o atividade jornalístika nian haktuir lei ida-ne’e.
- Funsionáriu públiku ka ajente Estadu, ne’ebé komete atentadu bá liberdade imprensa sei hetan kastigu ho pena-prizaun to’o tinan-tolu ka multa.
- Tentativa nu’udar punivel.
- Responsabilidade kriminál infratór nian, la hahaat direitu hodi fó indemnizasaun tuir saida maka hatuur iha rejime jerál responsabilidade sivíl nian.
Lee Mós: Prezidente Repúblika La Konkorda SEKOMS Intervein Redasaun RTTL,E.P
Jornalista Estajiária : Zita Menezes