Reabilitasaun Merkadu Manleu Atinje Porsentu 73 no Merkadu Taibessi Porsentu 85

Hatutan.com, (19 Jullu 2024), Díli–Reabilitasaun merkadu Manleu atinje  73% no merkadu Taibessi atinje ona 85%.

Lee Mós: Governu Halo Adjudikasaun Direita Projetu Reabilitasaun Merkadu Taibesi ho Manleu ho Kustu $200.000

Hariis-fatin públiku ne’ebé Governu kontrata empreza sira estabelese iha Merkadu Manleu. Foto/Leopoldina de Carvalho

Rebabilitasaun merkadu rua ne’e, Ministériu Komérsiu  no Indústria ( MCI, sigla portugés) fó adjudikasaun direita bá kompañia nasionál Walgen Walter10 Unipessoal, Lda hodi responsavel bá merkadu Taibessi no  Rheyna Junior Unipessoal, Lda responsabiliza reabilitasaun bá merkadu Manleu ne’ebé hahú tuir kontratu sei entrega bá Governu iha fulan-Setembru, tinan ne’e.

Daudaun ne’e hariis-fatin rua (2)  mak afinaliza ona, haat sei iha faze konstrusaun, kompostu husi hariis-fatin rua  iha atinje 50% no rua foin hahú 5%.

Diretór kompañia Rheyna Junior Unipessoal, Lda,  Junior Pereira  bá Hatutan.com, Sesta (19/07/2024),  iha Merkadu Manleu garante katak reabilitasaun merkadu Manleu sei termina tuir kontratu no sei entre bá obra na’in (Governu) iha fulan-Setembru.

Diretór Walgen Walter10 Unipessoal, Lda, Walter Martins, informa reabilitasaun ba merkadu Taibessi daudaun ne’e  atinje ona 85 % ho nia espesifikasaun servisu mak halo kanalizasaun bee-moos no harii hariis-fatin unidade neen (6) iha merkadu refere.

“Hela ida mak foin daudauk hadi’a fali BoQ ho ekipa ADN aumenta tan item balun nune’e foin hahú fali reabilitasaun” Walter Martins hateten.

Husi hariis-fatin hitu (7) ne’e hariis-fatin  tolu prontu ona, tolu sei iha faze pinta, no ida  sei iha prosesu reabilitasaun.

Mezmu kontratu ne’e nia durasaun tempu to’o fulan-neen, maibé Walgen Walter10 Unipessoal, Lda halo esforsu hotu atu termina no entrega bá owner ka projetu na’in (Governu) la to’o fulan-neen.

Iha biban ne’e, Ministru Komérsiu no Indústria (MCI), Filipus Nino Pereira husu negosiante sira atu kuida ambiente iha merkadu Manleu no  soe lixu sira iha fatin lixu nian.

“Ita iha regra ba merkadu no regulamentu ne’e iha. Karik ida-ne’e presiza iha sosializasaun no diálogu beibeik ho vendedór sira atu kuida fasilidade sira ne’ebé Governu harii, inklui kuida ambiente merkadu nian,” Nino Pereira hateten.

Total vendedór iha Merkadu Manleu  1,315   no Merkadu Taibessi na’in-2,000 liu. Reabilitasaun  merkadu rua (2) ne’e hahú nia  kontratu  iha loron 08 fulan-Maiu 2024 ho nia kustu projetu bá kada merkadu $100,000. Nune’e, reabilitasaun merkadu rua ne’e nia kustu hamutuk $200,000.

Jornalista: Leopoldina de Carvalho