SPTO Oferese Formasaun Kona-bá Mekanizmu Foti Dadus Hodi Dezenvolve Turizmu TL

Hatutan.com, (22 Jullu 2024), Díli— Organizasaun South Pacific Tourism Organization (SPTO) oferese formasaun bá Governu no parseiru sira kona-bá mekanizmu foti dadus atu dezenvolve turizmu iha Timor-Leste (TL).

Organizasaun South Pacific Tourism Organization (SPTO) oferese formasaun bá Governu no parseiru sira kona-bá mekanizmu foti dadus atu dezenvolve turizmu iha Timor-Leste (TL), iha salaun enkontru JL Vila Ai-mutin, segunda (22/07/2024). Foto: Lazaro Pereira Quefi.

Formasaun ne’e realiza tanba Ministériu Turizmu no Ambiente nu’udár membru bá South Pacific Tourism Organization (SPTO) no hetan apoiu hosi Governu Nova Zelándia.

Lee Mós: Kalbuadi Husu Ministériu Sira Ne’ebé Tutela bá MKAE Prioritiza Programa IX Governu

“Formasaun ne’e hala’o durante loron haat ne’ebé foka liu kona-bá área turizmu nian liu-liu atu foti dadus hodi dezenvolve turizmu iha TL,” diretor jerál turizmu, António da Silva hateten iha salaun enkontru JL Vila Ai-mutin, segunda (22/07/2024).

Iha formasaun ne’e mós aprende kona-bá oinsá utilizasaun instrumentu bá peskiza iha área turizmu liu-liu kona-bá kolesaun dadus, analiza dadus no produsaun dadus iha Timor-Leste.

Nia dehan, partisipante sira mai hosi Banku Sentrál, Diresaun Estatístika TL, diresaun jerál migrasaun ho ONG sira no mós ministériu turizmu rasik inklui ministériu relevante sira.

Formasaun iha área turizmu ne’e sei hala’o durante loron 4 hahú hosi loron 22 to’o 26 Jullu 2024  iha salaun enkontru JL Vila.

Jornalista Estajiariu: Lazaro Pereira Quefi