Dili
Populasaun Díli Mós Halerik Bee-Moos
Hatutan.com, (24 Jullu 2024), Díli– Parlamentu Nasionál liuhosi membru Bankada PD Antonio da Concecão husu Governu no Bee Timor-Leste, Empreza Públiku (BTL,E.P) atu tau atensaun bá preokupasaun populasaun sira iha Díli laran, inklui sira iha área rurál iha territóriu nasionál ne’ebé to’o ohin loron nafatin halerik bá bee-moos.
Lee Mós: EDTL,E.P Uza Millaun $5 Sosa Kontadór Rihun 120-resin
Tékniku BTL,E.P monta kontadór bá distiruisaun bee-moos iha komunidade sira-nia uma. Foto/BTL,E.P
“Atu fó hanoin Governu iha situasaun ida agora bailoron hela komunidade barak mak halerik loos bá bee-moos, halerik bá rai rahun tanba ne’e ha’u hakarak fó hanoin bá Governu liuliu bá BTL,E.P atu haree situasaun bee-moos iha Dilí laran ne’e. Situasaun konkreta mak iha área Ai-mutin no fatin seluk tán ne’ebé mak populasaun iha ne’ebá ne’e menus tebes bee-moos balu hetan no balu la hetan,” Deputadu Antonio da Concecão iha nia intervensaun iha Plenária PN, Kuarta (24/07/2024).
Nia akresenta tán katák situasaun seluk mak haree iha Díli laran ne’e kuazé kada tinan populasaun lamenta bá bee-moos, tanba agora daudaun bailoron nune’e, importante tebes atu BTL,E.P, kontrolu didi’ak para bele asegura populasaun sira nian saúde tanba falta bee-moos ne’e bele prejudika bá labarik no ema boot sira nian Saúde.
Iha fatin hanesan Deputadu husi Bankada FRETILIN, António Calau haktuir tán katák bee-moos kuazé fulan-fulan reprezentante povu iha PN hato’o hela de’it maibé Governu seidauk rezolve.
“Ita nian komunidade sira iha Timor-Laran tomak espesiál iha Munisípiu Díli sempre halerik hela de’it bá bee-moos mak hanesan komunidade sira iha Ai-mutin, Tasitolu, Manleuana Bairru-Pité no sentru saúde sira hanesan iha Becora, no Kristu Rei ne’ebé falta bee-moos” Deputadu António Calau hateten.
Husi parte Governu nia liu husi Vise-Ministru Asuntu Parlamentár Adérito Hugo da Costa informa, nia sei envia asuntu ne’e bá ministériu relevante sira atu buka solusaun bá problema bee-moos.
Jornalista Estájiaria : Zita Menezes