FMDC-UN WOMEN Entrega Matadalan Reportajen Sensível Jéneru bá CI

Hatutan.com, (25 Jullu 2024), Dilí—Fundasaun Médis Development Center (FMDC), UN Women estabelese kooperasaun ho Conselho Imprensa (CI) hodi entrega matadalan reportajen sensível bá jéneru, nune’e bele promove média no eleva kapasidade jornalista sira oinsá bele halo reportajen ho di’ak bá asuntu igualdade jéneru iha Timor-Leste.

Fundasaun Médis Development Center (FMDC), UN Women estabelese kooperasaun ho Conselho Imprensa (CI) hodi entrega matadalan reportajen sensível bá jéneru, nune’e bele promove média no eleva kapasidade jornalista sira oinsá bele halo reportajen ho di’ak bá asuntu igualdade jéneru iha Timor-Leste, salaun Enkontru FMDC, Hudi-Laran, kinta (25/07/2024). Foto: Zita Menezes. 

Prezidente CI Otelio Oté hateten, CI iha kooperasaun di’ak ho Fundasaun Médis Development Center (FMDC) UN Woman no Sekretária Estadu Igualdade (SEI), nune’e ho manuál matadalan ida ne’ebé entrega bá CI ne’e bele elevá kapasidade jornalista sira nian bá asuntu igualdade jéneru sira.

Lee Mós: Publikasaun Notísia, Jornalista Sira Presiza Sensível bá Jéneru ho Inkluzaun

“Agradese bá UN Women no SEI ne’ebé kontinua fó apoiu tanba kobertura bazeia bá jéneru sai asuntu importante iha ita nia rai liu-liu média tau papél importante bá asuntu ida-ne’e,” Otelio Ote hateten iha  serimónia entrega matadalan reportajen sensível jéneru, kinta (25/07/2024).

Sekretáriu Etadu Komunikasaun Sosiál (SEKOMS) Expedito Dias Ximenes hateten, promove igualdade jéneru la’ós de’it fó espasu atu diskuti asuntu sira relasiona ho jéneru maibé mós garante katák asuntu sira ne’e bele hetan tratamentu ho maneira ne’ebé sensível no respeitu.

Hasa’e koñesimentu kona-bá asuntu jéneru presiza esforsu koletivu no jornalista fó sira nia kontribuisaun bá mudansa sosiál ho prekonseitu sira ne’ebé bele eduka povu.

Nune’e mós Sekretária Estadu Igualdade (SEI), Elvina de Sousa hateten, tenki iha programa sira hanesan ne’e hodi servisu hamutuk ho parseiru sira nune’e bele iha duni reportajen ne’ebé sensível bá jéneru.

“Tanba ne’e mak ami hanoin kooperasaun importante tebes no la hotu iha ne’e. Tenke fó tan formasaun bá jornalista sira hodi iha liu sensivel liután iha sira nia produtu relasiona ho igualdade jéneru,” nia hateten.

Jornalista Estajiária: Zita Menezes