Ministru Miguel Manetelu Akompaña ho Besik Kazu Asédiu Seksuál iha MTK

Hatutan.com, (30 Agostu 2024), Díli–Ministru  Transporte no Komunikasaun (MTK), Miguel Marques  Gonçalves Manetelu, hateten nia parte akompaña ho besik kazu asédiu seksuál ne’ebé deskonfia prátika husi Diretór ezekutivu ida iha Ministériu Transporte no Komunikasaun  hasoru funsionária ida, foin lalais ne’e.

Lee Mós: CFP Hein Keixa husi Vítima Bá Kazu Asédiu Seksuál husi DE Ajénsia Estadu ida

Ministru Transporte no Komunikasaun (MTK), Miguel Marques Gonçalves Manetelu. Foto/Tome da Silva

Ministru Miguel Marques Gonçalves Manetelu informa, bainhira kazu ne’e sai diskusaun iha públiku, nia parte simu ona audiénsia separasaun ho vítima no mós ho diretór ezekutivu ne’e hodi rona parte rua no nia rasik lia-tun bá parte ne’ebé konsidera vítima no parte diretór ezekutivu, katak nia akompaña ho besik no nu’udár ministru nia pozisaun mak prosesu ne’e la’o tuir nia natureza Lei.

“Ha’u simu duni parte ne’ebé konsidera hanesan vítima  tanba nia  husu pedidu atu halo audensia, entaun hau simu hodi akomoda no depois ha’u hateten ha’u akompaña prosesu ne’e, hau hakarak prosesu nia lalaok ne’e la’o to’o iha ne’ebé,” Ministru Miguel Manetelu hateten hodi responde Hatutan.com iha Palásiu Governu, Díli, Kuarta 07 fulan-Agostu 2024.  

Atu halo balansu bá informasaun iha kestaun kazu asédiu seksuál ne’e, Ministru Miguel Manetelu bolu ona diretór ezekutivu iha diresaun ne’ebé tutela bá Ministériu Transporte no Komunikasaun (MTK)  refere hodi rona informasaun ruma.

Husi parte ne’ebé konsidera hanesan vítima, liuhusi nia advogadu sira husi JU,S Jurídiku Sosiál   submete karta bá Ministru Miguel Manetelu no nia parte lee ona karta husi JU,S nian hodi husu atu ministru foti sansaun disiplinár, maibé nu’udár ministru  sei haree no husik prosesu ne’e la’o tuir nia natureza Lei.

Iha loron 16 fulan-Agostu 2024, hale’u tuku 10:00 dadeer,  vítima ne’ebé akompaña husi família hakat bá edifísiu MTK ho intensaun hasoru-malu ho Ministru Miguel Manitelu, no hafoin hasoru-malu, parte família seidauk bele ko’alia ka pronúnsia buat ruma bá mídia tanba kontínua hela iha prosesu laran.

Informasaun ikus katak Ministru Transporte no Komunikasaun, Miguel Marques Manetelu submete ona keixa sira husi parte vítima nian ne’ebé hetan akompañamentu husi família, JU,S ho FOKUPERS ne’e bá ona Komisaun Funsaun Públiku (CFP, sigla portugés) atu halo investigasaun no hola desizaun tuir Lei no kompeténsia ne’ebé atribui bá CFP.

Vítima bá kazu asédiu seksuál ne’ebé akontese iha edifísiu ajénsia Estadu ida ne’ebé tutela bá Ministériu Transporte no Komunikasaun (MTK) akompaña husi nia família, Kinta 25 fulan-Jullu 2024, hale’u tuku 11:23 Otl,  hakat bá Edifísiu  FOKUPERS iha Farol, Díli,  hodi husu protesaun kona-bá kazu asédiu seksuál ne’ebé vítima  hanesan funsionária enfrenta husi nia diretór ezekutivu.

Iha loron hanesan, vítima ho família mós bá hasoru malu ho Provedór Direitu Umanu no Justisa (PDHJ), Virgílio da Silva Guterres, hodi hato’o mós keixa no hafoin husi PDHJ vítima ho família sira bá hasoru mós parte  J,US Jurídiku Sosiál  atu bele akompaña vítima bá arrola kazu ne’e iha Tribunál.

Asédiu seksuál mak hahalok krime seksuál neʼebé ema halo la ho lisensa. Inklui book ka kona ema nia isin ka koʼalia lia-fuan neʼebé liga ho buat seksuál.

Asédiu seksuál nu’udár krime violasaun seksuál ne’ebé previstu iha Kódigu Penál Timor-Leste iha Artigu 171° kona-bá koasaun seksuál konjuga Artigu 179° kona-bá abuzu seksuál bá ema ne’ebé labele reziste.

Lee Mós: DE iha Ajénsia Estadu Ida Komete Asédiu Seksuál, Hahú Husi Hasé Bonita Loos, Telefone Husu Hasoru iha Otél To’o Konvida Viajen bá Bali

Jornalista: Leopoldina de Carvalho