RDDU Lamenta Atuasaun SEATOU Hasoru Vendedór Ambulante sira

Hatutan.com, (04 Setembru 2024), Díli- Rede Defensoria Direitus Umanus (RDDU) lamenta ho atuasaun Sekretáriu Estadu Toponímia no Organizasaun Urbana (SEATOU) ho pesoál guarda munisípiu Dili (GMD) hasoru vendedór ambulante sira tamba baku rahun no estraga vendedór sira nia sasán inklui modo sira ne’ebé fa’an.

Konférensia imprensa RDDU ih Farol, Díli, Kuarta (04/09/2024). Foto/Elio dos Santos da Costa

Portavós Rede Defensoria Direitus Umanus, Inocêncio de Jesus Xavier hateten RDDU atu mai reafirma fali pozisaun ba akontesimentu rua ne’ebé akontese hodi kalan, ida hasoru vendedór ambulante sira no ida seluk hasoru ita nia jornalista Diligente nian.

Situasaun ida ne’e lori Timor-Leste ba kotuk refleta tinan 25  konsulta populár no tinan 24 invazaun Indonézia no  RDDU ne’ebé hakru’uk ba prinsípiu Direitus Umanus no Justisa lamenta ho situasaun sira husi autoridade estadu nian, inklui SEATOU ne’ebé falta respeitu ba dignidade umanu, aktu ida ne’e refleta fila fali 1999, tanis ida hodi kalan ne’e hanesan refleta tinan 25 ne’ebé ema halai husik hela ema nia sasan.

Estragu sira hodi kalan demonstra fila fali fitar no kanek sira ne’ebé akontese iha tinan 25 ba kotuk, hanesan joven, RDDU lamenta ho atuasaun, klaru katak imi notifika bei-beik, halo aproximasaun bei-beik mas imi mós tenke buka hatene kondisaun sira iha merkadu.

RDDU mós esklarese katak SEATOU labele mai justifika katak sira notifika ona, klaru notifika mas kondisaun merkadu  la di’ak duni ne’ebé hatudu katak ema sira fa’an ne’e merese duni iha Rotunda Nicolau Lobato nian.

Agora ko’alia kona-ba engarrafamentu dala barak la’ós ema fa’an na’in mak halo engarrafamentu, tuir RDDU nia haree dala ruma sira sosa na’in mak para motor, karreta kontribui ba engarrafamentu ne’e. ho nune’e sira husi polísia tranzitu sira orienta karreta sira ne’ebé para iha merkadu Rotunda nian ne’e sees husi fatin refere, tanba husi fatin sira ne’e ema sosa na’in sira mak kontribui ba engarrafamentu.

“Ha’u hatete ba Guarda sira imi ohin tau farda ne’e imi han modo ida ne’e, keta halo imi han modo ne’e sukit imi loron ida, povu nia matabeen ne’e todan ne’ebé ita husu se ita-nia povu ne’e sala ita eduka, la’ós hanesan povu ne’e sala ita ba baku no ita oho ne’e la’ós ukun na’in ida di’ak, aman ida di’ak bainhira nia oan hamlaha husu paun nia aman fó paun, la’ós fó fatuk,” Inocêncio de Jesus Xavier ba jornalista sira iha sede RDDU, Faról, Kuarta (04/09/2024).

RDDU husu Xefe Estadu nia asaun no uma kreda nia lian

RDDU husu mos ba Prezidente Repúblika nu’udar símbolu unidade nasionál, nu’udar Xefe Estadu atu haree mós situasaun ida ne’e

Ba uma kreda, ba konvensaun relijiozu hotu-hotu serake teologia libertasaun ne’e imi haluha ona, sarani sira afurs sofre barak ne’e imi nonok de’it, ita hakarak haree mós Igreja nia papél iha situasaun ida ne’e.

Uma kreda Labele nonok ba sarani sira agora ne’e ka bibi luhan imi lakohi tama, hakarak tama bibi Palásiu de’it.

Jornalista: Vito Salvadór