CAC Sei Rekolla Dadus no Investiga Projetu sira Adjudikasaun Direta iha MAPPF

Hatutan.com, (16 Setembru 2024), Díli—Komisaun Anti-Korrupsaun (CAC, sigla portugés) presiza rekolla dadus no iha investigasaun bá projetu ho karater adjudikasaun direta iha Ministériu Agrikultura, Pekuária, Peska no Floresta (MAPPF).

Ilustrasaun Transparency International

Komisáriu CAC, Rui Pereira dos Santos, Segunda (16/09/2024), haktuir lia-hirak ne’e hodi responde jornalista sira iha Parlamentu Nasionál (PN) relasiona ho informasaun ne’ebé espalla no viral ona  iha média sosiál Facebook ne’ebé revela kona-bá komunikasaun  ka mensajen WhatsApp entre ema balun ne’ebé deskunfia Diretór Jerál MAPPF ho parte balun kona-bá projetu sira iha MAPPF.

Iha komunikasaun WhatsApp ne’ebé espalla viral ne’ebé Hatutan.com mós asesu, katak parte balun, atu hanesan ka deskunfia Diretór Jerál MAPPF, halo mensajen hela ho ema-balun  ka kontraktor ida, ko’alia kona-bá projetu irrigasaun iha Maliana-Bobonaro nian no husi komunikasaun ne’e parte rua mós transmite bá malu kona-bá projetu moru protesaun iha Batugade ne’ebé parte kontraktor promete sei fó porsentu 9 (9%) bá parte Diretór Jerál karik projetu ne’e nia mak bele kaer ka fó tutan bá parte empreza seluk husi Munisípiu Ermera ka  koordenadór partidu ida husi Ermera nian.

Komisáriu CAC, Rui Pereira dos Santos, konsidera katak informasaun ne’ebé espalla iha média sosiál Facebook  ne’e bele loos no mós bele lalos tanba ema bele inventa.

“Maibé ida ohin viral iha média ne’e imi nain hira bele hatene dala-ruma ema bele halo screenshoot bele inventa sasan, ne’ebé husi parte CAC iha unidade parte seguransa ne’ebé mak bele rekolla lalais sasan sira ne’e orijinal ka lae? Se la orijinal ita persija buka tuir, ne’e foin iha média, ita sidauk haree ema nia kontratu tenderizasaun ne’e prosesu hotu,” Rui Pereira dos Santos hateten.

Komisariu CAC, Rui Pereira dos Santos  esplika kada konkursu públiku ka projetu estadu nian ne’e iha nia kumprimentu  bá lei aprovizionamentu nian ka Rejime Jurídiku Aprovizionamentu (RJA) ka Regime Jurídico do Aprovisionamento, dos Contratos Públicos e das Respetivas Infrações.

“Husu ba média sira persiza haree didiak, ema balun gosta no  la  gosta, ne’e inventa sasan. Tanba ne’e persija informasaun ne’ebé adekuadu, ho diak,” Rui Pereira hateten tan.  

Kona-bá bainhira mak hahú investigasaun bá kazu ne’e, Komisariu  CAC ne’e deklara katak parte CAC foin simu informasaun,  tanba ne’e persiza fó tempu unidade CAC nian atu rekolla informasaun.

Ministru Marcos da Cruz Bolu Ona DJ

Ministru Agrikultura, Pekuaria, Peska no Floresta ( MAPPF) Marcos da Cruz, informa nia parte bolu ona diretór jerál   nune’e bele prosesa hodi buka hatene komunikasaun ne’ebé halo relasiona ho projetu sira adjudikasaun direta iha MAPPF no virál iha Facebook.

“Ita respeita nafatin  prejunsaun inosensia ka asas praduga tak bersalah ne’ebé buat hotu tenke prova liu husi instituisaun kompetente sira,” Ministru Marcos da Cruz  hateten.

Tuir Marcos iha prosesu adjudikasaun  direita ka tuir konkursu públiku tenke obedese ka orienta tuir Lei Aprovizionamentu. Tanba ne’e, prosesu hotu Lei mak regula.

Daudaun ne’e iha projetu boot tolu  mak iha  hela  prosesu tenderizasaun iha Komisaun Nasionál Aprovizionamentu  (CAN,sigla portugés), mak hanesan  projetu irigasaun Maliana II, irigasaun Uatuwa, Gariuai, Baucau no irigasaun Irabere-Uatucarbau-Viqueque.

Tuir estimativa kustu projetu irrigasaun Uatuwa nian millaun $26.57, irrigasaun Irabere nian millaun $11.96 no irrigasaun Maliana II nia orsamentu prevee kedas iha 2021 ho montante millaun $357.

Jornalista: Leopoldina de Carvalho