Xanana Orienta Konsul Jerál TL bá Belfast Tau Matan bá Timoroan sira

Hatutan.com, (01 Outubru 2024), Díli-Primeiru-Ministru, Kay Rala Xanana Gusmão, Tersa (01/10/2024), hala’o enkontru ida ho Konsúl Jerál Timor-Leste dezignadu bá Belfast, Abreu Ximenes Coreia, molok Aranka bá hala’o misaun diplomátika iha Belfast iha fulan-Outubru ne’e nia rohan.

Konsúl Jerál Timor-Leste dezignadu bá Belfast, Abreu Ximenes Coreia

Durante hasoru malu iha Palásiu Governu, Díli, Xefe Governu Xanana Gusmão fó ona orientasun bá diplomata Timoroan ne’e identifika didi’ak timoroan sira iha Belfast, husu sira-nian situasaun, no buka oinsá atu bele reprezenta Timor-Leste iha mundu.

“Hasoru malu ho sua-exelénsia señor primeiru-ministru, antes aranka bá hala’o misaun nu’udár konsul jerál bá Belfast. Ha’u mai iha ne’e, hodi hasoru malu ho sua-exelénsia para simu orientasaun no sua-exelénsia fó orientasaun katak, bá servisu no fó asisténsia, tulun bá ita-nia sidadaun sira ne’ebé maka iha Belfast ne’ebá. Buka hatene sira nia situasaun, sira servisu iha setór saída, depois fó asisténsia bá sira,” Konsúl Jerál Timor-Leste Dezignadu bá Belfast ne’e informa bá jornalista sira iha Palásiu Governu.

Konsúl Jerál Timor-Leste dezignadu bá Belfast, Abreu Ximenes Coreia, hala’o hela kontaktu regulár ho Embaixadór Timor-Leste nian iha Reinu Unidu, João Paulo Rangel, para organiza oinsá, uainhira nia to’o ne’ebá, sira bele hasoru malu ho komunidade sira ne’ebé mak hela iha Belfast.

Konsul maka reprezentante ofisiál Governu ida nian ne’ebé hela iha nasaun estranjeiru ida hodi tulun no proteje sidadaun sira hosi konsúl nia nasaun, no atu promove no fasilita relasaun komersiál no diplomátika entre nasaun rua ne’e nian.

Jornalista: Rogério Pereira Cárceres