Desportu
Jogador Selesaun Nasionál Na’in-rua Falsifika Idade no Hetan Penalidade hosi AFC
Hatutan.com, (08 Outubru 2024), Díli- Asian Football Confederation (AFC) notifika Federasaun Futeból Timor-Leste (FFTL) tanba iha falsifikasaun idade ba jogador ekipa selesaun nasionál Jaimito António da Costa Soares ho António da Costa Soares Moniz.
Lee Mós: Kongresu FFTL Falla, Komité Eleitorál La Prudente no Inkapasidade
Foto/Repro Pájina Facebook AFC
Komité Disiplinár no Étika AFC hasai desizaun ne’e iha loron 25 fulan-Setembru ho Nú. Ref. VVC 20240925DC01, hodi fó penalidade ba jogador selesaun nasionál Timor-Lerste, Jaimito António da Costa Soares ho Id Card No. 06030410069970001 no António da Costa Soares Moniz.
Iha desizaun penalidade ne’e bandu atu jogador Jaimito Antonio da Costa Soares ho António da Costa Soares Moniz atu partisipa iha kualkér eventu internasionál futeból nian durante tinan ida no ba jogador Jaimito Antonio Da Costa Soares sei selu koima ho montante $10,000.00 no ba jogador António da Costa Soares Moniz selu koima ho valor $5,000.00, tamba iha duni faktu katak jogador na’in-rua ne’e falsifika idade hodi partisipa iha jogu AFC U19 Championship 2020 (Qualifiers) ne’ebé kompete iha 2019 no AFC U23 Asian Cup 2022 (Qualifiers) ne’ebé kompete iha 2021.
Fontes informasaun iha FFTL ne’ebé husu atu labele publika nia identidade, konfirma karta notifikasaun husi AFC relasiona ho falsifikasaun idade husi jogador Jaimito Antonio Da Costa Soares hodi ba kompete iha jogu AFC UU19 Championship 2020 no AFC U23 Asian Cup 2022 ne’e FFTL simu ona notifikasaun.
“FFTL simu ona notifikasaun, jogador na’in-rua ne’e simu sansaun sei la joga iha kompetisaun internasionál hotu-hotu durante tinan ida no entre sira na’n-rua n’ee na’in-ida selu koima $10,000.00 no ida seluk mós selu koima $5,000.00. Baibain FFTL mak tenke selu,” fontes haktuir ba Hatutan.com, Tersa (08/10/2024).
Falsifikasaun ne’ebé komete mak jogador Jaimito Antonio da Costa Soares uza naran hanesan ho identidade hanesan diferensa mak tinan moris de’it (Jaimito uza tinan moris lolós Jaimito ne’e 1999 no maibé nia tau fali tinan moris 2003..
Desizaun AFC
Karta ofisiál AFC. Foto/Repro
Falsifikasaun Artigu 61 Kódigu Dixiplinár no Étika AFC, inexigibilidade Artigu 56, Kódigu Dixiplinár no Étika AFC.
Integridade Konduta Artigu 70, Kódigu Dixiplinár no Étika AFC – Edisaun 2018.
Integridade Konduta Artigu 70, Kódigu Dixiplinár no Étika AFC, Kolaborasaun Artigu 114.1, Kódigu Dixiplinár no Étika AFC.
Haree ba violasaun sira ne’ebé Jogador Selesaun nasionál Jaimito António da Costa Soares ho António da Costa Soares Moniz komete mak AFC hasai Terms desizaun hanesan tuir mai ne’e:
- Jaimito António da Costa Soares komete ona krime tuir Artigu 61 no 70 Kódigu Dixiplinár no Étika AFC – Edisaun 2018.
- Jaimito António da Costa Soares komete ona krime tuir Artigu 61, 56 no 70 Kódigu Dixiplinár no Étika AFC – Edisaun 2019.
- Jaimito António da Costa Soares hetan bandu hodi partisipa iha atividade ne’ebé relasiona ho bola durante períodu fulan sanulu-resin-rua.
- Jaimito António da Costa Soares tenke selu multa ho valór $10,000.00
- Pena multa ne’e sei rezolve iha loron 30 nia laran husi loron ne’ebé desizaun ne’e komunika tuir Artigu 11.3 Kódigu Dixiplinár no Étika AFC – Edisaun 2019.
- Jaimito António da Costa Soares hetan informasaun katak violasaun beibeik ba provizaun hirak-ne’e bele hetan kastigu ne’ebé grave liu.
Iha desizaun ne’e mós hateten katak Órgaun judisiáriu sira bele deside atu labele komunika baze ba desizaun, maibé atu komunika de’it termu desizaun. Kualkér pedidu baze ba desizaun tenke haruka ho eskrita iha loron sanulu (10) nia laran hafoin simu tiha desizaun. La konsege halo ida-ne’e sei halo desizaun ne’e sai finál no obrigatóriu.
Hosi sorin seluk, Hatutan.com tenta konfirma asuntu ne’e ho Sekretáriu Jerál FFTL, Gregório Correia, maibé la konsege no tenta ona komunika liuhusi WhatsApp maibé seidauk bele responde to’o notísia ne’e publika.
Jornalista: Vito Salvadór