Internasionál
Enkontru Bilaterál Da-huluk Entre PM Xanana-Prezidente RI Prabowo, Ko’alia Mós Kona-bá Fronteira Sira
Hatutan.com, (21 Outubru 2024) DILI—Primeiru-Ministru (PM), Kay Rala Xanana Gusmão hasoru-malu ho Prezidente Repúblika Indónezia (RI), Prabowo Subianto, iha Palásiu Prezidensiál Jakarta, Indónezia, segunda (21/10/2024).
Primeiru-Ministru (PM), Kay Rala Xanana Gusmão hasoru-malu ho Prezidente Repúblika Indónezia (RI), Prabowo Subianto, iha Palásiu Prezidensiál Jakarta, Indónezia, segunda (21/10/2024). Foto: Média GPM.
Enkontru entre líder na’in-rua nu’udár sorumutu dahuluk no ofisiál hafoin Prezidente Repúblika Indonézia, Prabowo Subianto simu pose nu’udár Xefe Estadu, iha Parlamentu Nasionál, Senayan, Jakarta, domingu (20/10/2024).
Lee Mós: Momentu Amizade Horta-Prabowo iha Forum Diálogu Shangri-La iha Singapura
“Durante enkontru líder na’in-rua diskute kooperasaun bilaterál entre país rua, inklui asuntu fronteira Terrestre,” Hatutan.com sita komunikadu.
Alende ne’e, PM Xanana felisita Prabowo Subianto ne’ebé susesu iha eleisaun no parabeniza bá knaar foun nu’udár Xefe Estadu.
Akompaña Xefe Governu, Xanana Gusmão komposta hosi Ministru Negósiu Estranjeiru no Kooperasaun (MNEK), Bendito dos Santos Freitas, Sekretáriu Estadu Komunikasaun Sosiál, Expedito Dias Ximenes no Embaixadór Timor-Leste iha Indonézia, Roberto Soares.
Jornalista: Rogério Pereira Cárceres