Tenente Jenerál Falur Rate Laek Konsidera Kazu Falsifikasaun Idade Jogadór Selesaun Nasionál La’ós Kulpa Ezekutivu FFTL

Hatutan.com, (25 Outubru 2026), Díli- Prezidente Interinu Federasaun Futeból Timor-Leste (FFTL),  Tenente Jenerál Domingos Raul “Falur Rate Laek”, konsidera falsifikasaun idade jogadór selesaun nasionál, Jaimito Antonio da Costa Soares ho António da Costa Soares Moniz la’ós kulpa ezekutivu FFTL, maibé ida-ne’e akontese dezde uluk kedas no presiza hotu-hotu nia kontribuisaun atu hadi’a.

Lee Mós: Komisaun Nasionál Desportu Husu Governu Provizoriamente Hapara Apoiu bá FFTL

Prezidente Interinu FFTL, Tenente Jenerál Domingos Raul “Falur Rate Laek”. Foto/Elio dos Santos da Costa

Prezidente Interinu FFTL Tenente Jenerál Domingos Raul “Falur Rate Laek” hato’o deklarasaun ne’e hodi hatán ba jornalista sira bainhira husu kona-ba pozisaun FFTL nian ba sansaun husi Asian Football Confederation (AFC) ba jogadór selesaun nasionál Jaimito Antonio da Costa Soares ho António da Costa Soares Moniz tamba falsifika idade hodi tuir kompetisaun no partisipa iha jogu AFC U19 Championship 2020 (Qualifiers) ne’ebé kompete iha 2019 no AFC U23 Asian Cup 2022 (Qualifiers) ne’ebé kompete iha 2021.

“Ho falsifikasaun idade ne’ebé iha, tamba ida-ne’e mak ema fó sansaun ba ita-ne’e, imi jornalista sira labele mai fó fali kulpa ba ha’u dehan, ha’u mak falsifika fali buat ne’e, buat ne’e dezde uluk kedas. Ha’u ida agora no ami ida agora hamriik iha ne’e, ami halo esforsu para atu fase hena fo’er sira uluk rai hela iha ne’e, tamba ne’e husu ba parte hotu-hotu kontribui para hadi’a buat ne’e,” Prezidente Interinu  FFTL, Tenente Jenerál Domingos Raul “Falur Rate Laek” ba jornalista sira iha edifísiu FFTL, Díli, Sesta (25/10/2024).

Prezidente Interinu FFTL Tenente Jenerál Domingos Raul “Falur Rate Laek” mós rekoñese katak nia laiha koñesimentu kona-ba futeból, maibé simu responsabilidade atu hadi’a no implementa regra sira atu hadi’a no dezenvolve futeból ba oin.

“Ha’u horibainhira dehan ona katak bola ne’e ha’u laiha koñesimentu, mas depois de impozisaun ha’u simu de’it mas ida ne’e la’ós ha’u mak hakarak, nein eleitu, tamba de’it problema sira hanesan tinan kotuk ne’e maka ha’u simu de’it no ha’u simu ona ne’e nu’udár responsabilidade tamba ne’e ha’u tenta implementa regra, ne’ebé ema labele dehan fali buat la la’o, buat la di’ak hotu ne’e,” Falur Rate Laek hateten.

Ho  kazu falsifikasaun idade jogadór selesaun nasionál Jaimito Antonio da Costa Soares ho António da Costa Soares Moniz ne’e halo Governu no públiku liu-liu Fundadór FFTL sira, antigu jogadór selesaun nasionál, Amante Futeból sira hato’o lamentasaun no husu responsabilidade ezekutivu FFTL nian atu asegura labele iha tan kazu sira ne’ebé bele afeta ba imajen futeból Timor-Leste nian iha mundu.

Jornalista: Vito Salvadór