Desportu
Prepara bá Kongresu 2025, FFTL Hili Ema Na’in-10 Lidera Komité Independente
Hatutan.com, (26 Outubru 2024), Díli- Federasaun Futeból Timor-Leste (FFTL), Sábadu (26/10/2024), iha Novo Turismo, realiza kongresu estraordináriu hili ema na’in-10 ba lidera komité independente hodi prepara ba kongresu FFTL 2025.
Iha kongresu FFTL ne’e, kongresista sira ka asembleia maioria fó votu afavór hodi hili Reinaldo Francisco Luis ba lidera komité eleitorál nu’udár prezidente no Titolivio Januario Sarmento ba vise-prezidente no Amândio dos Santos ba membru.
Kongresu FFTL iha Novo Turismo, Sábadu (26/10/2024). Foto/Elio dos Santos da Costa
Prezidente Komite Disiplina no Etika mak Fernando da Costa, vise-prezidente Domingos C. Guterres no Antonio da Silva Sarmento nu’udár membru.
Prezidente Komité Appeal Arnaldo da Costa Lopes, vise-prezidente Lucia de Canossa Silva no Manuel Martins hanesan membru.
Unidade Auditoria no Konformidade lidera husi José António do R. Soares hanesan ofisiál.
Prezidente Interinu FFTL, Tenente Jenerál Domingos Raul “Falur Rate Laek” hateten, kongresu ne’e hili ona membru Komisaun Independente sira, medida hirak-ne’e importante tebes atu asegura normalizasaun ba atividade no kontinua hasae prestasaun servisu FFTL nian. Tanba ne’e, husu membru hotu atu hamutuk no koopera hodi realiza kongresu ida ne’e bele susesu.
Nia afirma ida-ne’e sai hanesan enkuadramentu tranzitóriu ne’ebé ho nia objetivu atu regulariza estrutura governasaun FFTL no mós atu mantein kontinuidade atividade futeból iha Timor-Leste. Maske FFTL enfrenta dezafiu, iha área reforma governasaun hodi kompleta estrutura FFTL nian.
“Ita kompromete atu haforsa hodi asegura kompetisaun doméstika no internasionál sira ne’ebé hetan apoiu husi AFC no AFF. Signifika katak permite ita atu mantein ita-nia partisipasaun no progresu atu bele hasa’e padraun ffuteból iha ita nia rain,” Prezidente Interinu FFTL, Tenente Jenerál Domingos Raul “Falur Rate Laek” hateten.
Prezidente Interinu FFTL mós husu ba Komité Independente sira ne’ebé eleitu liu husi Kongresu ne’e atu kontinua servisu ho profesionalidade hodi prepara ba kongresu FFTL iha 2025.
Janeiru 2025, eleisaun ba Prezidente no membru ezekutivu FFTL
Prezidente Interinu FFTL, Tenente Jenerál Domingos Raul “Falur Rate Laek” . Foto/Elio dos Santos da Costa
Prezidente Interinu FFTL Tenente Jenerál Domingos Raul “Falur Rate Laek” hodi komite ezekutivu nia naran, hakarak apela ba kongresista sira hotu katak kongresu ba eleisaun prezidente no membru ezekutivu hodi kompleta estrutura atuál sei realiza iha loron 11 fulan-Janeiru 2025 bazeia ba rekomendasaun husi FIF A no AFC
“Husu ba kongresista sira hotu atu mai ita kolabora hamutuk hodi obedese ba regra no ajenda kongresu estraordináriu ida ne’ e atu bele aprova kandidatu órgaun independente sira nune’e bele dirije kongresu eleisaun ba Prezidente no Membru Ezekutivu FFTL iha loron 11 fulan-Janeiru 2025,” Falur Rate Laek informa.
Falur Rate Laek subliña liután katak kongresu ida ohin ne’e determinante ba kongresu FFTL ne’ebé sei mai iha 2025 tamba ne’e parabéns ba delegadu sira husi asosiasaun Futeból munisípiu no ba FIFA no AFC ba sira nia reprezentante ne’ebé mau observa direita kongresu ne’e.
Iha kongresu ne’e mós kongresista siraaAprova alterasaun nesesáriu ba Estatutu FFTL, Relatóriu Atividade, Konsolidasaun Finansa no relatóriu Auditoria.
Jornalista: Vito Salvadór