2025, Governu Rekruta Membru PNTL 300

Hatutan.com, (28 Outubru 2024), Dili—IX Governu Konstitusionál liu-hosi Ministériu Interior (MI), planeia ona atu rekruta tán membru Polísia Nasionál Timor-Leste (PNTL) foun na’in-300 iha tinan 2025.

Serimónia aniversáriu PNTL iha Bairru-Pité Díli, Kuarta (27/03/2024). Foto/Dok.Elio dos Santos da Costa.

Ministru Interiór, Francisco da Costa Guterres informa, oras-ne’e dadaun ministériu halo hela preparativu atu nune’e tinan oin anunsia rekrutamentu bá públiku ho nia kritériu sira.

Lee Mós: Ministériu Defeza ho F-FDTL Loke Rekrutamentu iha Rejime Espesiál bá Ema Na’in-87

“Ami mai fó hatene bá deputadu sira katak, tinan oin ami hahú rekrutamentu foun. Kona-bá númeru ha’u seidauk bele ko‘alia didi’ak tanba ami ho Komandu PNTL sei haree fali. Maibé sei rekruta entre 250 to’o 300,” Ministru Francisco Guterres hateten hafoin Audiénsia Públika ho Membru Komisaun B, Parlamentu Nasionál (PN),  segunda (28/10/2024).

Iha propósta Orsamentu Jerál Estadu (OJE) 2025, prevee bá Ministériu Interiór (MI) $15,000,336, fahe bá kategória Saláriu Vensimentu $12,276,037, Béns servisu $2,158,319, Kapitál Menor $40,184, kapitál Dezenvolvimentu $525,796.

Aloka bá programa seguransa Nasionál $10,450,323, fahe bá kategória Saláriu vensimentu $9,379,142, Béns servisu $1,066,181 kapitál Menor $5,000 ho nia sub-programa  haat (4)  ho nia atividade sira hamutuk  24.

Kona-bá Programa funsionamentu no dezenvolvimentu institusionál $4,550,013, fahe bá kategória Saláriu vensimentu $2,896,895, Béns servisu $1,092,138, kapitál Menor $35,184, Kapitál dezenvolvimentu $527,796 ho  sub-programa rua (2) no  atividade hitu (7).

Audiénsia públika ho Membru Komisaun B PN ne’e, Ministru Francisco Guterres akompaña hosi Sekretáriu Estadu Protesaun Sívil (SEPS), Domingos Mariano Reis, Segundu Komandante PNTL, Komisáriu Polisia Pedro Belo, sira aprezenta asuntu rua.

Asuntu rua ne’e, ida kona-bá progresu ezekusaun OJE 2024 nian, iha ne’ebé Ministériu Interiór, ezekuta ona 75%, (hosi Millaun $16), PNTL nian atinje 76% (hosi totál millaun $47), no Autórdade Protesaun Sívil atinje 77,1%, (hosi orsamentu millaun $7).

“Tanba ne’e mak iha 2024 ne’e ami prezenta katak, ezekusaun hothotu, balun iha ona 78%, balun 75%, balun 74%, balun 76%. Ami nia ezekusaun la’o di’ak hela,” nia tenik.

Seluk fali maka aprezente kona-bá planu 2025 nian, saida mak MI presiza atu, nune’e bele kontinua reforsa servisu ne’ebé maka ministériu halo ona no halo dadauk iha tinan ida ne’e nia laran.

Programa ida mak hadi’a jestaun sira iha fronteira liu-liu atu harii Postu seguransa hamuutk 47 bá UPF ho Millaun $2,5.

Alende ne’e, sei konstrui mós Eskuadra Kuarteis Munisipais Dili, Likísa, Ermera ho Aileu, inklui Eskuadra 6, Dili tolu (Vera Cruz, Na’in-Feto ho Cristo Rei). Eskuadra Loré, Eskuadra Hatulia B, Eskuadra rua iha Quelicai (ida iha Quelicai Villa no ida seluk besik iha Foho Matebian).

 Jornalista: Rogério Pereira Cárceres