Konstrusaun Uma Merkadu Pune ho $306.226,94 Konklui Ona

Hatutan.com, (06 Novembru 2024), RAEOA— Konstrusaun uma merkadu iha aldeia Pune, suku Usitasa’e, sub rejiaun Oesilo, Rejiaun Administrativa Espesiál Oecusse Ambeno (RAEOA), ho montante orsamentu $306.226,94 konklui ona no sei halo inaugurasaun iha tempu badak.

Konstrusaun mma merkadu Pune ne’ebé konklui ona. Foto: Lázaro Pereira Quefi.

Uma merkadu ne’e hanesan projetu hosi Oitavu Governu nian no kontinua hosi IX Governu Konstitusionál liu hosi Sekretáriu Rejionál Asuntu Komérsiu no Indústria ho númeru kontratu 145/2023/PA/RAEOA-ZEESM TL.

Lee Mós: Estudante EBF Binibu Pune Lori Bee-Moos Hosi Uma Bá Eskola

Obra ne’e responsabiliza hosi kompaña Elo Mano Unipesoal Lda hahú iha loron 10 fulan dezembru tinan 2023 to‘o 10 dezembru 2024. 

“Buat hotu-hotu remata ona no iha tempu badak ita inaugural,” Xefi Suku Usitasa’e, Thomas Colo hateten ba Hatutan.com iha sede suku Usitasa’e, kuarta (06/11/2024).

Ba utilizasaun merkadu ne’e, Autoridade lokál sei halo regulamnetu bá negosiante sira hodi identifika sira ne’ebé mak hela permanente sira ne‘ebé mak hela semi-permanente atu hotu-hotu kontribui bá kuidadu sasan Estadu nian hamutuk ho komunidade Usitasa’e tomak.

Autoridade lokál haruka ona karta pedidu inaugurasaun bá parte Ministériu Komérsiu no Indústria atu inaugura antes komemorasaun loron 28 Novembru nune‘e komunidade bele utiliza uma ne’e  tanba kuaze tinan ida ona negosiante sira utiliza de’it estrada públiku.

Thomas Colo apela bá negosiante hotu-hotu ne’ebé mai hosi fatin oioin atu koopera no ho konsiénsia tomak kuidadu fatin ne’e, labele soe foer arbiru hodi garante nafatin ijiéne maski fasilidade bázika seidauk kompletu.

Jornalista Estajiáriu: Lázaro Pereira Quefi